चैत्र १७, सोलुखुम्बु । प्रधानमन्त्री बालेन्द्र शाहले बोलाएको कोशी प्रदेशका प्रतिनिधीसभा सदस्यहरुको बैठकमा सोलुखुम्बुका प्रतिनिधीसभा सदस्य प्रकाशसिंह कार्कीले १३ बुँदे एजेण्डा प्रस्तुत गर्नुभएको छ । सोमबार प्रधानमन्त्री समक्ष कार्कीले जिल्लाको समग्र विकासका लागि १३ बुँदे महत्वपूर्ण एजेन्डा प्रस्तुत गर्दै सरकारको ध्यानाकर्षण गराउनुभएको हो । सांसद कार्कीले विशेष गरी पूर्वाधार, स्वास्थ्य, शिक्षा, ऊर्जा, सञ्चार र पर्यटन क्षेत्रलाई केन्द्रमा राख्दै सोलुखुम्बुको दीर्घकालीन विकासका लागि ठोस योजनाहरू अघि सार्नुभयो ।
उहाँले बिपी राजमार्ग हुँदै सोलुखुम्बु, ओखलढुंगा र खोटाङ जोड्ने सडकको स्तरोन्नति, कालोपत्रे तथा वर्षौंदेखि अलपत्र रहेका पुलहरू यथासिघ्र सम्पन्न गर्नुपर्नेमा जोड दिनुभएको थियो । यस्तै, खुम्बुपासाङल्हमु र सोताङ गाउँपालिकामा विद्युत सबस्टेसन निर्माण गरी कालापत्थरसम्म १३२ केभीए लाइन विस्तार गरेर जिल्लाभर विद्युत पहुँच पु¥याउनुपर्ने माग गर्नुभयो ।
उहाँले दुधकोशी करिडोर निर्माणलाई प्राथमिकतामा राख्दै गोल्डेन सगरमाथा सडक कालोपत्रे तथा सदरमुकामबाट सबै गाउँपालिका जोड्ने सडक सञ्जाल विस्तार गर्नुपर्ने माग राख्नुभएको थियो । साथै, बर्खुघाट, दिलिघाट, अधेरी लगायत स्थानमा डिपिआर तयार भएर पनि निर्माण हुन नसकेका मोटरेबल पुलहरू छिटो सम्पन्न गर्नुपर्ने उहाँको माग छ ।
स्वास्थ्यतर्फ फाप्लु अस्पतालमा ब्लड बैंक स्थापना, सुविधासम्पन्न एम्बुलेन्स व्यवस्था र सबै पालिकामा अस्पताल स्तरोन्नतिको आवश्यकता औंल्याउनुभयो । यस्तैखानेपानीको पहुँच जिल्लाभर विस्तार गर्नुपर्ने, कृषकहरूको उत्पादन बजारीकरणका लागि प्रत्येक गाउँपालिकामा निःशुल्क कृषि एम्बुलेन्सको व्यवस्था गर्नुपर्ने, त्यसैगरी, नेपाल टेलीकमकोसेवा जिल्लाभर विस्तार, बाँदर नियन्त्रण, वैज्ञानिक शिक्षा प्रणाली विकास तथा विद्यालय सुधारमा विशेष ध्यान दिनुपर्ने उनले जोड दिए ।
पर्यटन प्रवद्र्धनका लागि ७२ सिट क्षमताको जहाज बस्न सक्ने विमानस्थल निर्माणको सम्भाव्यता अध्ययन गर्नुपर्ने र नेचासल्यानमा निर्माणाधीन प्रविधीक शिक्षालय सिटिइभिटी अन्तर्गतको आंगिक क्याम्पसलाई तीव्र गतिमा सम्पन्न गरी सञ्चालनमा ल्याउनुपर्ने माग समेत उहाँले राख्नुभएको थियो । सांसद कार्कीका यी प्रस्तावहरूले सोलुखुम्बुको समग्र विकासका लागि दीर्घकालीन रोडम्याप प्रस्तुत गरेको विश्लेषण गरिएको छ ।
Discussion about this post