ज.जा निमाविका पूर्व विद्यार्थीहरूले दिए विद्यालयलाई खेलकुद सामाग्री 

चैत्र १७, सोलुखुम्बु ।  सोलुखुम्बुको सोलुदुधकुण्ड नगरपालिका वडा नम्बर ५ सल्लेरीमा रहेको जनजागृति निमाविमा पूर्व विद्यार्थीहरूले खेलकुद सामाग्री वितरण गरेका छन् । विद्यालयका प्रधानाध्यापक शिव कुमार राईलाई पूर्व विद्यार्थी आशिष दाहाल लगायतका पूर्व विद्यार्थीहरूले विभिन्न खेलकुदका सामाग्री हस्तान्तरण गरेका हुन ।

उक्त विद्यालयमा २०५० देखी ०५७ सम्म अध्ययन गरेका विद्यार्थीहरूले आर्थिक सङ्कलन गरेर विद्यार्थीहरूको अतिरिक्त कृयाकलापमा सहयोग पुगोस् भन्ने हेतुका साथ खेलकुदका सामाग्री हस्तान्तरण गरिएको हो । पूर्व विद्यार्थी आशिष दाहालको अगुवाईमा हाल विभिन्न स्थानमा रहेका २२ सहपाठीहरुको सहयोगमा विद्यालयलाई सामाग्री वितरण गरिएको हो ।

सामाग्री वितरण पछि बोल्दै पूर्व विद्यार्थी दाहालले आफूहरूले अध्ययन गरेको विद्यालयलाई केही गर्न सकिने असामा सहयोग गरिएको उल्लेख गर्नुभयो । उहाँले केही समय पछि विद्यार्थीहरूलाई सूचना प्रविधि र शेयर बजार सम्बन्धी अभिभुखिकरण गर्ने योजना रहेको सुनाउनुभयो । यसले विद्यार्थीहरूलाई वर्तमान सूचना प्रविधिको सही सदुपयोग कसरी गर्ने भन्ने विषयमा बुझ्न मद्दत गर्ने विश्वास लिइएको समेत उल्लेख गर्नुभयो ।

 सामाग्री बुझ्दै विद्यालयका प्रधानाध्यापक राईले विद्यार्थीहरूले आफूले शिक्षा लिएको विद्यालयलाई माया गरेकोमा विद्यार्थीहरूलाई धन्यवाद व्यक्त गर्नुभएको थियो । कार्यक्रममा लक्ष्मी सनराइज बैँक सोलुखुम्बुका प्रमुख चूडा राज सुवेदी सहित पूर्व विद्यार्थीहरू लगायतको उपस्थिति रहेको थियो ।