सोलुखुम्बुमा एसइईका केन्द्राध्यक्षलाई अभिमुखीकरण

चैत्र १७, सोलुखुम्बु । माध्यमिक शिक्षा परीक्षा (एसइई) लाई व्यवस्थित, मर्यादित र निष्पक्ष रूपमा सञ्चालन गर्ने उद्देश्यले सोलुखुम्बुमा परीक्षा केन्द्राध्यक्षहरूका लागि अभिमुखीकरण तालिम सञ्चालन गरिएको छ । शिक्षा विकास तथा समन्वय इकाई सोलुखुम्बुले जिल्लाका विभिन्न परीक्षा केन्द्रका लागि नियुक्त केन्द्राध्यक्षहरूलाई एकदिने अभिमुखीकरण तालिम प्रदान गरेको हो ।

तालिममा परीक्षा सञ्चालन प्रक्रिया, प्रश्नपत्रको सुरक्षित ढुवानी, तथा परीक्षालाई मर्यादित र व्यवस्थित बनाउन आवश्यक प्रशासनिक र प्राविधिक पक्षबारे जानकारी दिइएको शिक्षा विकास तथा समन्वय इकाई सोलुखुम्बुका प्रमुख पुण्यराज डंगोलले बताउनुभयो । प्रमुख डंगोलको अध्यक्षतामा सम्पन्न उक्त कार्यक्रममा जिल्लाभरका १४ परीक्षा केन्द्रका केन्द्राध्यक्षहरूको सहभागिता रहेको थियो । कार्यक्रममा सहभागी केन्द्राध्यक्षहरूलाई परीक्षा सञ्चालनका क्रममा अपनाउनुपर्ने मापदण्ड, अनुशासन कायम गर्ने उपाय तथा आवश्यक निर्देशन प्रदान गरिएको थियो ।

यस वर्षको माध्यमिक शिक्षा परीक्षा (एसइई) चैत १९ गतेदेखि सुरु हुँदैछ । सोलुखुम्बु जिल्लाबाट कुल १ हजार ६ सय ३६ विद्यार्थी परीक्षामा सहभागी हुने भएका छन् । जसमध्ये नियमित साधारणतर्फ १ हजार ५ सय १३, प्राविधिक धारतर्फ ९९ र ग्रेडवृद्धितर्फ २४ विद्यार्थी सहभागी हुनेछन्।

ती विद्यार्थीहरूले सोलुदुधकुण्ड नगरपालिका, माप्य दूधकोशी गाउँपालिका, सोताङ गाउँपालिका, महाकुलुङ गाउँपालिका, लिखुपिके गाउँपालिका र खुम्बु पासाङल्हामु गाउँपालिकाका विभिन्न परीक्षा केन्द्रहरूबाट परीक्षा दिने शिक्षा विकास तथा समन्वय इकाईका सूचना अधिकारी विर्मा डाँगीले जानकारी दिनुभयो । उहाँका अनुसार एसइई परीक्षाको तयारी अन्तिम चरणमा पुगेको छ ।