साल्मे, सिस्नेरी पहिरोमा भासिएको सडक ट्राफिक प्रहरीको अगुवाईमा मर्मत

चैत १८, सोलुखुम्बु । ट्राफिक प्रहरीले साल्मे सिस्नेरी सडकको पहिरो क्षेत्रमा सडक मर्मत गरेको छ । जिल्ला ट्राफिक प्रहरी कार्यालय सोलुखुम्बु, प्रहरी चौकी रमिते र सडक डिभिजन कार्यालय ओखलढुंगा (हर्कपुर) को संयुक्त पहलमा सोलुखुम्बुको सोलुदुधकुण्ड नगरपालिका–११ अन्तर्गत सिद्धिचरण लोकमार्गको सिस्नेरी पहिरो क्षेत्रमा सडक मर्मत कार्यक्रम सम्पन्न गरिएको छ ।

आज सम्पन्न उक्त मर्मत कार्यअन्तर्गत पहिरोका कारण क्षतिग्रस्त सडक खण्डको उकालो भाग सुधार गरिएको हो । सडक अवरुद्ध हुँदा सवारी आवागमनमा समस्या उत्पन्न हुँदै आएकोमा मर्मतपछि यातायात सञ्चालन सहज हुने अपेक्षा गरिएको ट्राफिक प्रहरीका सूचना अधिकारी चन्द्र बस्नेतले बताउनुभयो ।

सिद्धिचरण लोकमार्गको उक्त खण्ड वर्षायाममा पहिरोको उच्च जोखिममा रहने क्षेत्रका रूपमा चिनिन्छ । सम्बन्धित निकायहरूले संयुक्त रूपमा मर्मत कार्य गरेपछि तत्कालका लागि जोखिम न्यूनीकरण भएको बताइएको छ । स्थानीय तथा यात्रुहरूले सडक मर्मतपछि आवागमन सहज बनेको प्रतिक्रिया दिएका छन्। साथै, सरोकारवाला निकायहरूले भविष्यमा पनि यस्ता जोखिमयुक्त स्थानमा नियमित अनुगमन र मर्मत कार्यलाई निरन्तरता दिने बताएका छन् ।