५० वर्ष पूरा गर्दै पञ्चावती आविले मनायो स्वर्ण जयन्ती

चैत्र १८, सोलुखुम्बु । उदयपुरको ताप्ली गाउँपालिकामा रहेको पञ्चावती आधारभूत विद्यालय, रामपुरले आफ्नो स्थापना कालको ५० वर्ष पूरा गरेको अवसरमा भव्य रूपमा स्वर्ण जयन्ती महोत्सव मनाएको छ । २०३१ सालमा स्थापना भई प्राथमिक विद्यालयको रूपमा सञ्चालन सुरु गरेको यस विद्यालयले २०६६ सालदेखि आधारभूत तह (कक्षा ६–८) सञ्चालन गर्दै आएको छ । स्वर्ण जयन्तीको अवसरमा विद्यालयले विविध कार्यक्रमहरूको आयोजना गरेको थियो । कार्यक्रममा पूर्व विद्यार्थी, अभिभावक तथा विभिन्न सहयोगी दाताहरूको उल्लेखनीय सहभागिता रहेको सहकर्मी ठविन्द्र मगरले जानकारी दिनुभयो ।

विद्यालय सञ्चालन तथा व्यवस्थापनका लागि सो अवसरमा कुल ४ लाख ५० हजार रुपैयाँ चन्दा संकलन भएको जानकारी दिइएको छ । विद्यालयको शैक्षिक अवस्था सुधार गर्ने उद्देश्यले निवर्तमान विद्यालय व्यवस्थापन समिति अध्यक्ष इन्द्र नारायण श्रेष्ठका स्वर्गीय हजुरबुबा खड्ग नारायण श्रेष्ठको स्मृतिमा उहाँका परिवारबाट १ लाख ५ हजार रुपैयाँ बराबरको अक्षयकोष स्थापना गरिएको छ । उक्त सहयोग दत्त नारायण श्रेष्ठ, हरि नारायण श्रेष्ठ, पूर्णमाया श्रेष्ठ तथा नातिहरू अशोक श्रेष्ठ, मोहन श्रेष्ठ र इन्द्र नारायण श्रेष्ठको संयुक्त परिवारबाट गरिएको हो ।

कार्यक्रम ताप्ली गाउँपालिका अध्यक्ष ढुङ्गराज विश्वकर्माको प्रमुख आतिथ्यता, उपाध्यक्ष धनामाया मगरको विशेष आतिथ्यता तथा विद्यालय व्यवस्थापन समिति अध्यक्ष इन्द्र नारायण श्रेष्ठको सभापतित्वमा सम्पन्न भएको थियो । कार्यक्रमका क्रममा विद्यालयलाई विभिन्न क्षेत्रमा सहयोग पु¥याउने व्यक्तित्वहरूलाई मायाको चिनो तथा प्रशंसा पत्र प्रदान गरिएको थियो भने पूर्व विद्यालय व्यवस्थापन समिति सदस्य, पूर्व शिक्षक तथा संस्थापकहरूलाई सम्मान समेत गरिएको थियो ।