सोलुदुधकुण्ड नगरपालिकाले वितरण गर्यो ६ लाख रुपैयाँ बराबरको कृषि सामाग्री

चैत्र १९, सोलुखुम्बु । सोलुखुम्बुको सोलुदुधकुण्ड नगरपालिकाले करिब ६ लाख रुपैयाँ बराबरको कृषि सामग्री वितरण गरेको छ । नगरपालिकाको ‘तरकारी पकेट विकास निरन्तरता कार्यक्रम’ अन्तर्गत वडा नम्बर ६ का ३० जना कृषकहरूलाई उक्त सामग्री प्रदान गरिएको हो । बिहीबार वडा कार्यालयमा आयोजित कार्यक्रममा ७ वटा कृषि फर्म र १ कृषक समूहमा आबद्ध कृषकहरूलाई सामग्री वितरण गरिएको नगरपालिकाले जनाएको छ ।

कार्यक्रममा नगरप्रमुख नाम्गेल जाङ्बु शेर्पाले वितरण गरिएको सामग्रीको प्रभावकारी उपयोग गर्दै कृषकहरूको आयआर्जन वृद्धि गर्न नगरपालिका प्रतिबद्ध रहेको बताउनुभयो । उहाँले कृषिलाई व्यवसायिक र आधुनिक बनाउन यस्ता कार्यक्रमले सहयोग पुग्ने विश्वास व्यक्त गर्नुभयो ।

उपप्रमुख गान्धिमाया तामाङले कृषकहरू स्वयं वडा कार्यालयमा उपस्थित भएर सामग्री बुझ्दा प्राविधिक ज्ञान र प्रयोग विधिबारे प्रत्यक्ष जानकारी पाउने बताउनुभयो । यस्तै वडा अध्यक्ष तथा नगर प्रवक्ता फुर्वा ग्याल्जेन शेर्पाले आफ्नो वडाका कृषकहरूलाई सामग्री उपलब्ध गराएकोमा नगरपालिकालाई धन्यवाद दिँदै प्राप्त सामग्रीको प्रभावकारी उपयोग गरी सकारात्मक नतिजा निकाल्न कृषकहरूलाई आग्रह गर्नुभयो ।

वितरण गरिएको सामग्रीमा हिल ट्याङ्क, सिँचाइ पाइप, प्लास्टिक टनेल, तरकारीका उन्नत बीउबिजन, थोपा सिँचाइ सेट तथा जैविक मल समावेश छन् । साथै, कृषकहरूको विशेष मागलाई ध्यानमा राख्दै ३ जनालाई मिनी टिलर र ३ जनालाई थोपा सिँचाइ सेट समेत उपलब्ध गराइएको नगरपालिककी कृषि शाखा प्रमुख डोल्मादिकी शेर्पाले जानकारी दिनुभयो ।