सोलुखुम्बुबाट सुत्केरी महिला र शिशुको हवाई उद्धार, थापाथलीमा उपचार हुँदै 

चैत्र १९, सोलुखुम्बु । सुत्केरी पछि शिशुको स्वास्थ्यमा समस्या आएपछि एक महिलाको उद्धार गरि काठमाण्डौ पठाइएको छ ।  सोलुखुम्बुको माप्य दुधकोशी गाउँपालिकाकी विन्दा राईको नवजात शिशुमा स्वास्थ्य समस्या आएपछि राष्ट्रपति महिला उत्थान कार्यक्रम अन्तर्गत सेनाको हेलिकप्टर मार्फत काठमाण्डौ पठाइएको हो । गाउँपालिकाको वडा नम्बर ५ निवासी ३४ वर्षीय राईले जिल्ला अस्पताल फाप्लुमा शिशुलाई जन्म दिएकी थिइन ।  

उनिहरुलाई विहीबार बिहान फाप्लु विमानस्थलबाट थापाथली प्रसुती गृहमा उपचारका लागी पठाइएको जिल्ला प्रशासन कार्यालय सोलुखुम्बुका सहायक प्रमुख जिल्ला अधिकारी देवेन्द्र सुवेदीले बताउनुभयो ।  उनिहरुलाई जिल्ला अस्पताल फाप्लु र जिल्ला प्रशासन कार्यालय सोलुखुम्बुको समन्वयमा हवाई उद्धार प्रक्रिया अघि बढाइएको थियो । शिशुमा सुरुमा मुटुमा समस्या देखिएको थियो भने पछि स्वासप्रश्वासमा समस्या देखिएको थियो ।

महिला, बालबालिका तथा ज्येष्ठ नागरिक मन्त्रालयले दुर्गम क्षेत्रका जोखिममा परेका गर्भवती तथा सुत्केरी महिलाहरूका लागि यो कार्यक्रम सञ्चालन गर्दै आएको छ। मन्त्रालयले तयार गरेको ’राष्ट्रपति महिला उत्थान इकाई दुर्गम क्षेत्रका ज्यान जोखिममा परेका गर्भवती तथा सुत्केरी महिलाहरूको हवाई उद्धार सम्बन्धी कार्यविधि, २०७५’ अनुसार सोलुखुम्बु सहित २९ जिल्लामा यो कार्यक्रम पूर्ण रूपमा लागू गरिएको छ। विकट भूगोल र यातायातको असुविधाका कारण समयमा उपचार नपाएर हुने मातृ तथा शिशु मृत्युदरलाई कम गर्न यो कार्यक्रम प्रभावकारी सावित भइरहेको छ।