कोशीका स्वास्थ्यमन्त्री लिम्बुले गरे जिल्ला अस्पताल फाप्लुको अनुगमन, क्षमता कम नै पहिलाे समस्या

चैत्र २०, सोलुखुम्बु । कोशी प्रदेशका स्वास्थ्य मन्त्री मान बहादुर लिम्बुले जिल्ला अस्पताल फाप्लुको अनुगमन गर्नुभएको छ ।  मन्त्रालयको नियमित अनुगमनका क्रममा यहाँ आइपुग्नुभएका मन्त्री लिम्बुले अस्पतालको अनुगमन गर्नुभएको हो ।  जिल्ला अस्पताल फाप्लुका व्यवस्थापन समिति अध्यक्ष एवं कार्यरत स्वास्थ्यकर्मीहरूको उपस्थितिमा मन्त्री लिम्बुले अनुगमन गर्दै स्वास्थ्य क्षेत्रको सवलीकरणका लागी मन्त्रालय सँधै सकारात्मक रहेको उल्लेख गर्नुभयो ।  

अनुगमनका क्रममा आयोजित एक औपचारिक कार्यक्रममा अस्पतालका समस्या, प्रगति र आवश्यकता राख्दै निमित्त मेडिकल सुपरिटेन्डेन्ट डाक्टर बिनेश मण्डलले अस्पतालको अवस्थाको बारेमा बिफ्रिङ गर्नुभएको थियो ।  यस्तै कार्यक्रममा अस्पताल व्यवस्थापन समिति अध्यक्ष तथा जिल्ला समन्वय समिति प्रमुख कृष्ण प्रसाद निरौलाले अस्पताललाई १५ बेडबाट बढाएर ५० बेड क्षमताको बनाउनु अति आवश्यक रहेको उल्लेख गर्नुभएको थियो ।  

उहाँले जिल्ला अस्पतालको सेवा र प्रभावकारिताका लागी जनशक्ति अभाव, उपकरणको अपर्याप्तता र ग्रामीण भूगोल प्रमुख समस्या रहेको उल्लेख गर्नुभएको थियो ।  जनशक्तिको मनोबल उच्च राख्न नसक्दा आएका कर्मचारीहरू समेत नटिक्ने समस्या व्याप्त रहेको स्वास्थ्यकर्मीहरूको बिफ्रिङ थियो ।  

अनुगमन पछि स्वास्थ्य मन्त्रालयका सचिव यदुनाथ घिमिरेले बजेट सीमित तर कार्यक्रम धेरै भएकाले कार्यान्वयनमा समस्या भइरहेको उल्लेख गर्नुभएको थियो ।  अनुगमनमा जिल्ला स्वास्थ्य कार्यालय सोलुखुम्बुका प्रमुख जीवन चौलागाईँ, मन्त्रालयका कर्मचारीको टोली, जिल्ला अस्पतालका डाक्टर एवं कर्मचारी लगायतका उपस्थिति रहेको थियो ।