सोलुखुम्बुमा वित्तीय अपचलन आरोपमा एक पक्राउ, अनुसन्धान जारी

चैत्र २२, सोलुखुम्बु । सोलुखुम्बुमा सामुदायिक लघुवित्त वित्तीय संस्था लिमिटेड अन्तर्गत विभिन्न शाखामा इकाई प्रमुखका रूपमा कार्यरत रहँदा कर्जा प्रवाह गरेको देखाई गैरकानुनी तवरबाट आर्थिक अपचलन गरेको आरोपमा एक जना पक्राउ परेका छन् । उक्त संस्थाको सल्लेरी शाखाका अख्तियारप्राप्त प्रतिनिधि वाङ्गेल लामाको जाहेरीका आधारमा नेपाल सरकार वादी र २७ वर्षीय सन्तोष मगर प्रतिवादी रहेको बैंकिङ कसुर तथा सजाय ऐन, २०६४ बमोजिम मुद्दा दर्ता भएको हो ।

मगरको नाममा उच्च अदालत विराटनगर, मोरङबाट पक्राउ पुर्जी जारी भएपछि खोजतलासका क्रममा उनलाई पक्राउ गरिएको प्रहरीले जनाएको छ । जिल्ला प्रहरी कार्यालय सोलुखुम्बुको प्रहरी टोलीले जिल्ला प्रहरी कार्यालय सिन्धुलीसँगको समन्वयमा चैत्र २० गते सिन्धुली जिल्लाको कमलामाई नगरपालिका–५, मधुटारबाट मगरलाई पक्राउ गरेको हो ।

पक्राउ परेका मगरलाई चैत्र २२ गते उच्च अदालत विराटनगरबाट ७ दिनको म्याद थप गरी थप अनुसन्धान भइरहेको जिल्ला प्रहरी कार्यालय सोलुखुम्बुका प्रहरी निरीक्षक तथा सूचना अधिकारी विकास राईले जानकारी दिएका छन् । घटनाबारे थप अनुसन्धान जारी रहेको प्रहरीले जनाएको छ ।