महाकुलुङमा आगलागी, एक लाख बराबरको क्षति

चैत्र २२, सोलुखुम्बु । सोलुखुम्बुको महाकुलुङ गाउँपालिका वडा नम्बर १ देउरालीमा आइतबार दिउँसो आगलागी हुँदा करिब एक लाख रुपैयाँ बराबरको क्षति भएको छ । दिउँसो करिब १२ बजेको समयमा देउराली निवासी मछेन्द्र नाथ राईको टिनको बेरा र टिनकै छानो भएको एकतले घरमा अचानक आगलागी भएको हो । आगलागीबाट घरभित्र रहेका अन्नपात, लत्ता कपडा तथा भाँडावर्तन पूर्ण रूपमा जलेर नष्ट भएको प्रहरीले जनाएको छ ।

जिल्ला प्रहरी कार्यालय सोलुखुम्बुका प्रहरी निरीक्षक तथा सूचना अधिकारी विकास राईका अनुसार आगलागीबाट करिब एक लाख रुपैयाँ बराबरको धनमाल क्षति भएको छ । घरमा आगलागी भएको सूचना प्राप्त हुनासाथ प्रहरी टोली तत्काल घटनास्थलमा खटिएको थियो। स्थानीय बासिन्दाको सहयोगमा आगो नियन्त्रणमा लिइएको प्रहरीले जनाएको छ । प्रारम्भिक अनुसन्धानका आधारमा विद्युत सर्ट भएर आगलागी भएको हुन सक्ने अनुमान गरिएको छ । यस घटनामा कुनै मानवीय तथा चौपाया क्षति नभएको पनि प्रहरीले पुष्टि गरेको छ ।