गौरीटापमा बन्यो जिपलाईन, झुम्न थाले पर्यटक

चैत्र २२, सोलुखुम्बु ।  सोलुखुम्बुमा जिल्लामै पहिलो सरकारी लगानीमा निर्मित जिपलाईन निर्माण सम्पन्न भएको छ ।  नेचासल्यान गाउँपालिकाको लगानीमा निर्मित ५ सय मिटर लामो जिप लाइन निर्माण सम्पन्न भइ सञ्चालनमा आएको हो ।  नेचासल्यान गाउँपालिकाको वडा नम्बर १ मा पर्ने पर्यटकीय क्षेत्र गौरीटापमा गत मंसिर अन्तिम साता सुरु भएको जिलाइन निर्माण कार्य ४ महिनामै निर्माण सम्पन्न भएको हो ।

गाउँपालिकाको ८० लाख रुपैयाँ लागत साझेदारीमा कालिका निर्माण सेवाले निर्माणको जिम्मा लिएको जिपलाई निर्माण सम्पन्न गरि परिक्षण समेत सम्पन्न भइसकेको छ ।  पर्यटनको प्रवर्द्धन गरि गाउँपालिकालाई परिचित गराउने उद्देश्य सहित सुरु गरिएको जिपलाईन निर्माणले गाउँपालिकाको आर्थिक विकासको क्षेत्रमा समेत योगदान गर्ने विश्वास लिइएको छ ।  चैत्र बैशाखमा फुल्ने २० औ रङ्गका गुराँस हेर्दै, त्यहाँबाट देखिने आधा दर्जन बढी हिमशृङ्खला नियाल्दै जिपलाईनको मजा लिन सकिने भएकाले पनि यसको उपादेयता र उपयोगिता निकै प्रष्ट रहेको गाउँपालिकाको ठहर छ ।

 जिपलाईन सँगै यहाँ जिपलाइन साइक्लिङ, टावर क्लाइम्बिङ जस्ता साहसिक पर्यटन खेलको निर्माण गरिएको छ ।  स्थानीय राजकुमार मगरका अनुसार यहाँ दैनिक ५० औ पर्यटकहरूले अवलोकन भ्रमण गर्ने गरेका छन् ।  जसले पत्ताले क्षेत्रमा पर्यटकको चहलपहल र गौरीटाप क्षेत्रमा अवलोकन भ्रमणको गतिविधि बढाएको छ ।  नयाँ वर्ष २०८३ को अवसरमा उद्घाटनको तयारी गाउँपालिकाले गरेको भएपनि उद्‌घाटन नहुँदै जिपलाईनमा हुइँकिन चाहनेहरूका भिड थेगिनसक्नु भएको एक स्थानीयले बताएका छन् ।  

गाउँपालिका अध्यक्ष धन जन राईका अनुसार निर्माण सम्पन्न भइसकेको र अव यसलाई कसरी र कुन तरिकाबाट सञ्चालन गर्ने भन्ने विषयमा छलफल गरि कार्यविधि बनाएर अघि बढ्ने तयारी छ ।  आइतबार निर्माण कम्पनीबाट औपचारिक रुपमा गाउँपालिकालाइ हस्तान्तरण भएका संरचना र त्यसको अनुगमन गर्दै अध्यक्ष राईले यसले गाउँपालिकाको पर्यटन विकासमा टेवा पुग्ने विश्वास व्यक्त गर्नुभयो ।

 गाउँपालिका उपाध्यक्ष विना राईले जिपलाईन जिल्लाकै नमुना कामको रुपमा प्रशंसा भइरहेको भन्दै उत्पादन मुखी विकासले राम्रो नतिजा दिने दावी गर्नुभयो ।