चैत्र २३, सोलुखुम्बु । सोलुखुम्बुको माप्य दुधकोशी गाउँपालिकामा मेलमिलापकर्ताकाे लागी ५ दिने पुनर्ताजगी तालीम सुरु भएको छ । गाउँपालिकाको आयोजनामा मेलमिलापकर्ताको लागी आजबाट ५ दिने पुनर्ताजगी तालीम सुरु भएको हो । वार्षिक कार्यक्रम अनुसार गाउँपालिका उपाध्यक्ष संयोजक रहने न्यायिक समितिको काम, कर्तव्यलाई चुस्त दुरुस्त बनाउन नियुक्त गरिएका मेलमिलापकर्ताको क्षमता अभिवृद्धि तथा नेतृत्व विकासका लागी तालिमको आयोजना गरिएको गाउँपालिका उपाध्यक्ष तथा कार्यक्रमका अध्यक्ष गौरव राईले बताउनुभयो । उहाँले मेलमिलापकर्ता समाजको शान्ति र न्यायका लागी अहम् भूमिका बहन गर्नुपर्ने जिम्मेवारी भएको स्मरण गराउँदै तालिमको प्रभावकारितालाई उत्कृष्ट बनाउन अनुरोध गर्नुभयो । तालीम उद्घाटन कार्यक्रमका प्रमुख अतिथि एवं गाउँपालिका अध्यक्ष बुद्धिकिरण राईले मेलमिलाप भन्ने शब्द आँफैमा निकै जिम्मेवार शब्द भएकाले मेलमिलापकर्ताको भूमिका आफैमा संवेदनशिल भएकाले तालिमलाई ध्यान दिएर लिन पनि आग्रह गर्नुभयो । ७ वटा वडा रहेको गाउँपालिकाबाट २७ जना मेलमिलापकर्ताहरुले तालीम लिइरहेका छन् । तालिमको सहजिकरण अधिवक्ता बिसन राईले गरिरहनुभएको छ ।
Discussion about this post