चैत्र २३, सोलुखुम्बु । सवारी दुर्घटना न्यूनीकरण गर्ने उद्देश्यले जिल्ला ट्राफिक प्रहरी कार्यालय सोलुखुम्बुले सडक सुरक्षासम्बन्धी महत्वपूर्ण पहल गरेको छ।कार्यालयका अनुसार जिल्ला ट्राफिक प्रहरी कार्यालय सोलुखुम्बु ले सडक डिभिजन कार्यालय हर्कपुर, ओखलढुंगासँग समन्वय गर्दै सिद्धिचरण लोकमार्गअन्तर्गत सोलुदुधकुण्ड नगरपालिका वडा नम्बर ८ जन्तरधापदेखि वडा नम्बर ४ फाप्लुसम्मको पक्की सडक खण्डमा रहेका घुम्तीहरूमा राखिएका कन्भेक्स मिरर (सडक ऐना) मर्मत तथा थप गर्ने कार्यक्रम सञ्चालन गरेको हो।
उक्त सडक खण्डमा करिब २० स्थानका जोखिमयुक्त घुम्तीहरूमा राखिएका ऐनाहरू मर्मत गरिएको र आवश्यक स्थानमा नयाँ ऐना जडान गरिएको ट्राफिक प्रहरीले जनाएको छ। ती घुम्तीहरू साँघुरा तथा दृश्यता कम हुने भएकाले दुर्घटनाको उच्च जोखिम रहेको बताइएको छ। यस कार्यक्रममार्फत चालकहरूलाई विपरीत दिशाबाट आउने सवारीसाधनबारे पूर्व जानकारी मिल्ने र दुर्घटना न्यूनीकरणमा उल्लेखनीय सहयोग पुग्ने अपेक्षा गरिएको छ।
ट्राफिक प्रहरीले सडक सुरक्षाका लागि यस्ता कार्यक्रमलाई निरन्तरता दिने जनाएको छ। साथै, चालकहरूलाई सावधानी अपनाउन, गति नियन्त्रणमा राख्न र ट्राफिक नियमको पालना गर्न आग्रह गरिएको छ।
Discussion about this post