सोताङ विकासका एजेन्डा नयाँ सरकारका टेवलमा, अध्यक्ष बस्नेतको दौडधुप तीव्र

चैत्र २३, सोलुखुम्बु । सोलुखुम्बुको सोताङ गाउँपालिकाका अध्यक्ष खिलराज बस्नेतले गाउँपालिकाको समग्र विकास र सेवा प्रवाह सुदृढीकरणका लागि संघीय सरकारका उच्च तहसम्म सक्रिय पहल थाल्नुभएको छ । नवगठित सरकारका मन्त्रीहरुसँग भेट्दै उहाँले गाउँपालिकाको विकास र सेवा प्रवाहमा टेवा पुग्ने विभिन्न योजना तथा मागहरु राख्नुभएको हो ।

यसैक्रममा उहाँले स्वर्णिम वाग्ले तथा निशा मेहता सँग शिष्टाचार भेट गर्दै सोताङका महत्वपूर्ण विकास एजेन्डाहरू प्रस्तुत गर्नुभएको छ । भेटका क्रममा अध्यक्ष बस्नेतले सोताङ प्राथमिक अस्पतालको १५ शैयाको भवन निर्माणका लागि बाँकी रकम यथाशीघ्र निकासा गर्न आग्रह गर्नुभयो । साथै, अस्पतालको सेवा स्तर उकास्न इसिजी, ल्याब उपकरण, अक्सिजन सपोर्ट प्रणाली लगायत अत्यावश्यक स्वास्थ्य सामग्री उपलब्ध गराउन स्वास्थ्य मन्त्रालयसमक्ष माग राख्नुभयो ।

अध्यक्ष बस्नेतले सोताङ–महाकुलुङ हुँदै किमाथाङ्का जोड्ने रणनीतिक सडक सञ्जाल विस्तारको प्रस्ताव समेत अघि सार्नुभयो, जसले चीनसँगको व्यापारिक पहुँच विस्तार गर्ने अपेक्षा गरिएको छ। यसबारे अर्थमन्त्री वाग्लेले आवश्यक अध्ययन र सम्भाव्यता विश्लेषण गरिने प्रतिबद्धता जनाउनुभएको छ ।

त्यसैगरी, सोताङ बृहत् खानेपानी आयोजनाका लागि कुल लागतको रु. ३ करोड रकम एलएमविआइएस प्रणालीमा समावेश भइसकेको जानकारी दिँदै बाँकी बजेट सुनिश्चित गरी बहुवर्षीय योजनाअन्तर्गत आगामी दुई आर्थिक वर्षभित्र आयोजना सम्पन्न गर्न अध्यक्ष बस्नेतले जोडदार माग गर्नुभयो । भेटमा उहाँले नेपालको वर्तमान आर्थिक–सामाजिक अवस्था, विकासका चुनौती र समाधानका उपायबारे समेत गहन छलफल गर्नुभएको थियो। स्थानीय तह सुदृढीकरण, पूर्वाधार विकास र आधारभूत सेवाको पहुँच विस्तारका लागि संघीय सरकारको प्रभावकारी नीति र सहयोग अपरिहार्य रहेको उहाँको भनाइ छ ।

यसैबीच, अध्यक्ष बस्नेतले प्रतिभा रावल सँग पनि भेट गर्दै स्थानीय तहमा कर्मचारी व्यवस्थापनका लागि प्रभावकारी समन्वय आवश्यक रहेको धारणा राख्नुभयो। साथै, हिमाल–पहाड–तराईबीचको असमान जग्गा हदबन्दी नीतिको पुनरावलोकन गर्नुपर्ने आवश्यकता औंल्याउनुभयो ।

अध्यक्ष बस्नेतले बजेट विनियोजन गर्दा सूचक मात्र होइन, स्थानीय आवश्यकता र भौगोलिक कठिनाइलाई प्राथमिकता दिनुपर्ने माग गर्दै ओखलढुंगा–सल्लेरी–नेले–सोताङ–महाकुलुङ हुँदै भोजपुर, उदयपुर र सुनसरी जोड्ने सडकलाई संघीय सडकअन्तर्गत स्तरोन्नति गर्न समेत सरकारसमक्ष कडा दबाब दिनुभएको छ । स्थानीय विकासका मुद्दा बोकेर संघीय सरकारको ढोका ढकढक्याउँदै हिँडेका अध्यक्ष बस्नेतको सक्रियता अहिले सोताङवासीका लागि आशाको किरण बनेको छ ।