सोलुखुम्बुमा पूर्वाधार विकासका लागि रास्वपाको ध्यानाकर्षण

चैत्र २५, सोलुखुम्बु । राष्ट्रिय स्वतन्त्र पार्टी (रास्वपा) सोलुखुम्बुले जिल्लाको समग्र विकासलाई तीव्रता दिन विभिन्न महत्वपूर्ण विषयहरू उठाउँदै जिल्ला प्रशासन कार्यालय सोलुखुम्बुको ध्यानाकर्षण गराएको छ ।

पार्टीले सोलुखुम्बु जिल्ला अन्य जिल्लाको तुलनामा विकासोन्मुख गतिमा रहेको उल्लेख गर्दै सडक पूर्वाधारलाई पहिलो प्राथमिकतामा राख्नुपर्ने जनाएको छ । हाल सल्लेरीसम्म कालोपत्रे सडक भए पनि त्यसपछिका अधिकांश क्षेत्रमा कच्ची सडककै प्रयोग गर्नुपर्ने बाध्यता रहेकोले यात्रामा असहजता, ढिलाइ र जोखिम हुने गरेको बताइएको छ ।

ध्यानाकर्षण पत्रमार्फत सल्लेरीदेखि खुम्बु पासाङल्हामु गाउँपालिका–२ सुर्के नागासारासम्म स्तरोन्नति वा कालोपत्रे सडक निर्माण यथाशीघ्र अघि बढाउन आग्रह गरिएको छ । साथै, सल्लेरीदेखि महाकुलुङ गाउँपालिकासम्म सडक कालोपत्रेको प्रक्रिया अघि बढाउन पनि जोड दिइएको छ । त्यसैगरी, सोलुदुधकुण्ड नगरपालिका–११ स्थित सिस्नेरी तिङ्लामा हरेक वर्ष पहिरोले समस्या सिर्जना गर्दै आएको उल्लेख गर्दै वैकल्पिक सडक निर्माणको पहल गर्न माग गरिएको छ।

रास्वपाले कृषि क्षेत्रतर्फ किसानलाई प्रदान गरिने अनुदान पारदर्शी र प्रभावकारी रूपमा लगानी गर्न, नियमित अनुगमन गरी तथ्यांक सार्वजनिक गर्न पनि माग गरेको छ। खानेपानीको अभाव समाधान गर्न आवश्यकताको पहिचान गरी योजना कार्यान्वयन गर्नुपर्ने विषय पनि उठाइएको छ।

शिक्षा क्षेत्रमा विद्यार्थी संख्या न्यून भएका विद्यालयहरूलाई मर्ज गर्नुपर्ने, साथै सोलुदुधकुण्ड नगरपालिका–७ गार्मामा निर्माण भए पनि हाल काठमाडौंबाट सञ्चालन भइरहेको नेपाल पर्वतीय प्रशिक्षण प्रतिष्ठानलाई सोही स्थानबाट सञ्चालनमा ल्याउनुपर्ने माग गरिएको छ। स्वास्थ्य सेवामा सुधारका लागि अस्पताल तथा स्वास्थ्य चौकीहरूलाई थप जिम्मेवार र उत्तरदायी बनाउनुपर्ने, विद्युत सेवाको विस्तार र गुणस्तर सुनिश्चित गर्नुपर्ने तथा उत्पादन अनुमति लिएर पनि काम अघि नबढाएका जलविद्युत आयोजनाहरूलाई शीघ्र सञ्चालनमा ल्याउनुपर्ने विषयमा पनि जोड दिइएको छ।

साथै, निर्माणाधीन तथा सञ्चालनमा रहेका जलविद्युत आयोजनाहरूले आफ्नो सामाजिक उत्तरदायित्वअन्तर्गत खर्च गरेको रकम सार्वजनिक गर्नुपर्ने माग गरिएको छ। प्राकृतिक स्रोत संरक्षणतर्फ सार्वजनिक खोलानालामा मापदण्डविपरीत भइरहेको ढुंगा, गिटी र बालुवा उत्खनन तथा दोहन तत्काल रोक्न अनुगमन र कानुनी कारबाही गर्न आग्रह गरिएको छ ।

यसका साथै सबै सरकारी कार्यालयबाट प्रदान गरिने सेवा प्रभावकारी, छिटोछरितो र पारदर्शी बनाउनुपर्ने माग पनि गरिएको छ। रास्वपा सोलुखुम्बुका सचिव तथा फागुन २१ गते सम्पन्न प्रतिनिधि सभा सदस्य निर्वाचनमा प्रत्यक्षतर्फका उम्मेदवार ऋषिधन राई प्रमुख जिल्ला अधिकारी लिला कुमारी के.सी. पाण्डेलाई ध्यानाकर्षण पत्र बुझाउनुभएको हो ।

पत्र बुझ्दै प्रमुख जिल्ला अधिकारी पाण्डेले प्रस्तुत मागहरूलाई सकारात्मक रूपमा लिने प्रतिक्रिया दिनुभएको छ ।