ताप्ली गाउँपालिका ३ वर्षभित्र पोषणमैत्री स्थानीय तह बन्ने लक्ष्यमा

चैत्र २५, सोलुखुम्बु । उदयपुरको ताप्ली गाउँपालिकाले आगामी तीन वर्षभित्र आफूलाई पोषणमैत्री स्थानीय तह घोषणा गर्ने लक्ष्यसहित महत्वपूर्ण निर्णय गरेको छ । बुधबार गाउँपालिकामा आयोजित “पोषणमैत्री स्थानीय शासन प्रवद्र्धन” सम्बन्धी सरोकारवालासँगको अन्तरक्रिया कार्यक्रममार्फत उक्त प्रतिबद्धता सार्वजनिक गरिएको हो । कार्यक्रमसँगै गाउँपालिकाले वडा नम्बर ५, रुपाटारलाई २०८३ साल मंसिर महिनाभित्र पोषणमैत्री वडा घोषणा गर्ने योजना पनि अघि सारेको छ ।

हालसम्म ताप्ली गाउँपालिकाका तीन वटा वडाहरू बालमैत्री वडा घोषणा भइसकेका छन् भने बाँकी दुई वडालाई पनि केही महिनाभित्रै घोषणा गर्ने तयारी भइरहेको छ । यससँगै सम्पूर्ण गाउँपालिकालाई बालमैत्री स्थानीय तह घोषणा गर्ने लक्ष्य राखिएको छ । गाउँपालिकाले पोषणमैत्री स्थानीय शासन कार्यान्वयन कार्यविधि तथा निर्देशिका अनुसार सात वटा विषयगत क्षेत्रअन्तर्गत पाँच चरणमा ४९ वटा सूचकहरू पूरा गर्नुपर्ने व्यवस्था रहेको जनाएको छ । ती सूचकहरू सम्बन्धित निकायबाट प्रमाणीकरण भएपछि मात्रै पोषणमैत्री घोषणा प्रक्रिया अघि बढ्नेछ ।

अन्तरक्रिया कार्यक्रममा सामाजिक कुप्रथा, रुढीवादी परम्परा, तथा बालविवाह जस्ता समस्याहरू न्यूनीकरण गर्न आवश्यक भूमिका र पहलका विषयमा पनि व्यापक छलफल गरिएको थियो । टोल विकास संस्था, बाल क्लब तथा अन्य सरोकारवालाहरूको सक्रिय सहभागितामा समुदायस्तरमा जनचेतना अभिवृद्धि गर्ने उपायहरूबारे विशेष बहस भएको थियो । स्थानीय सरकारको यस पहलले स्वास्थ्य, पोषण र बालअधिकार संरक्षणका क्षेत्रमा सकारात्मक परिवर्तन ल्याउने अपेक्षा गरिएको छ ।