रास्वपा सोलुखुम्बु र सडक डिभिजन हर्कपुरको सक्रियताः साल्मे–सिस्नेरी सडकको स्थलगत निरीक्षण

चैत्र २६, सोलुखुम्बु । ओखलढुगां–सल्लेरी सडक अन्तर्गत सोलुदूधकुण्ड नगरपालिका–११, तिङ्लास्थित साल्मे–सिस्नेरी सडक खण्डमा बारम्बार हुने पहिरोको समस्यालाई मध्यनजर गर्दै स्थलगत अनुगमन गरिएको छ । राष्ट्रिय स्वतन्त्र पार्टी (रास्वपा) सोलुखुम्बुको पहलमा सडक डिभिजन कार्यालय हर्कपुरको टोलीले बिहीबार उक्त क्षेत्रमा निरीक्षण गरेको हो ।

अनुगमनमा रास्वपा सोलुखुम्बुका सचिव तथा गत फागुन २१ गते सम्पन्न प्रतिनिधि सभा सदस्य निर्वाचनका प्रत्यक्षतर्फका उम्मेदवार क्रृषिधन राईको टोली र सडक डिभिजन हर्कपुरका इन्जिनियर सुमन राज बस्नेतको टोली सहभागी थियो । स्थलगत अवलोकनपछि रास्वपा सोलुखुम्बुका सचिव राईले साल्मे–सिस्नेरी सडक खण्डमा देखिएको समस्याको तत्काल र दीर्घकालीन समाधानबारे छलफल गरिएको बताउनुभयो ।

यदि दीर्घकालीन समाधान सम्भव नभएमा वैकल्पिक मार्गको खोजी अपरिहार्य देखिएको उहाँको भनाई रहेको छ । उता, सडक डिभिजन हर्कपुरका इन्जिनियर सुमन राज बस्नेतले सोलुखुम्बुको जटिल भौगोलिक अवस्थाका कारण सडक मर्मत गरे पनि समस्या पूर्ण रूपमा समाधान गर्न चुनौतीपूर्ण रहेको बताउनुभयो ।

उहाँले दीर्घकालीन समाधानका लागि विज्ञहरूको विस्तृत अध्ययन आवश्यक रहेकोमा जोड दिनुभयो । सिस्नेरी क्षेत्रमा वर्षेनी हुने पहिरोका कारण उक्त सडक खण्ड अवरुद्ध हुने समस्या दोहोरिँदै आएको छ, जसले स्थानीय बासिन्दा तथा यात्रुहरूलाई निरन्तर सास्ती दिँदै आएको छ ।