जिल्ला विपद न्यूनिकरण तथा व्यवस्थापन समिति सोलुखुम्बुको बैठक, सबै निकायलाई तम्तयारका लागी आह्वान 

चैत्र २६, सोलुखुम्बु । विपद पूर्व तयारीका लागी जिल्ला विपद व्यवस्थापन तथा न्यूनिकरण समितिको बैठक सम्पन्न भएको छ ।  विहीबार जिल्ला प्रशासन कार्यालय सोलुखुम्बुका प्रमुख जिल्ला अधिकारी लिला कुमारी केसी पाण्डेको अध्यक्षतामा सम्पन्न बैठकले आसन्न विपदको पूर्व तयारीका लागी विभिन्न निर्णयहरू गरेको छ । जिल्लाका ८ ओटै स्थानीय तहका विपद सम्बन्धित फोकल पर्सन, राजनैतिक दलका प्रमुख एवं प्रतिनिधि तथा कर्मचारी सम्मीलित बैठकले जिल्लामा विपद सम्बन्धी घटनाहरूका न्यूनिकरणका लागी विभिन्न उपायहरू अवलम्बन गर्नुपर्ने धारणाका साथै विपद व्यवस्थापनका रणनीतिक उपायहरू राखेका थिए ।

बैठकमा जिल्लाका गाउँ एवं नगरपालिकाले विपदका लागी यस अघि भए गरेका काम र आगामी तयारीसहितका बारेमा जानकारी गराएका थिए ।  उनीहरूले स्थानीय तहमा भएका विपद व्यवस्थापनका सामाग्री, गरिएका कामका बारेमा ब्रिफिङ गर्दै विपदको पूर्व तयारीका लागी तयार भएको जानकारी गराए । जिल्ला स्थीत सरकारी कार्यालयहरूले विपदसँग सम्बन्धित कार्यक्रमकाबारेमा जानकारी दिँदै विपदको घटनाहरूमा खटिने प्रतिवद्धता जनाएका छन् ।  

यता राजनैतिक दलहरूले सरकारले गर्नुपर्ने काम र समस्याहरूमा सरकारलाई ध्यानाकर्षण गराए । बैठकमा राष्ट्रिय स्वतन्त्र पार्टी, नेपाली काङ्ग्रेस, नेकपा एमाले, नेपाली कम्युनिष्ट पार्टी, श्रम संस्कृति पार्टी लगायत राजनीतिक दलका प्रतिनिधिको उपस्थिति थियो । यस्तै जिल्ला स्थीत सरकारी कार्यालयका प्रमुखहरूको उपस्थिति थियो । बैठक समापनमा बैठकका अध्यक्ष प्रजिअ पाण्डेले मातहत निकायबाट भएका निर्देशन र कार्यक्रमहरूलाई अक्षरसः पालना गरि विपदको न्यूनिकरण र व्यवस्थापन गर्न निर्देशन दिलाउनुभयो ।  उहाँले आफ्नो जिम्मेवारी निशर्त पुरा गर्न सके समस्या अघि समाधानको बाटो निश्कने दावी समेत गर्नुभयो ।