मूल्यवृद्धिको मारमा निर्माण व्यवसाय, सोलुखुम्बुका व्यवसायीको ध्यानाकर्षण

चैत्र २९, सोलुुखम्बु । मध्यपूर्वमा जारी युद्धका कारण इन्धनको मूल्यमा भइरहेको निरन्तर वृद्धि र त्यसको प्रत्यक्ष प्रभाव निर्माण क्षेत्रमा पर्न थालेपछि सोलुखुम्बुका निर्माण व्यवसायीहरूले सरकारको ध्यानाकर्षण गराएका छन् । जिल्ला निर्माण व्यवसायी संघ सोलुखुम्बुले आइतबार जारी गरेको प्रेस विज्ञप्तिमार्फत डिजेल, पेट्रोल, मट्टितेल लगायत इन्धनजन्य पदार्थको अत्यधिक तथा अप्रत्याशित मूल्यवृद्धिले निर्माण उद्योग संकटमा परेको जनाएको छ।

संघका अध्यक्ष वेदराज थापाद्वारा हस्ताक्षरित विज्ञप्तिमा इन्धनसँगै बिटुमिन, सिमेन्ट, डण्डी जस्ता अत्यावश्यक निर्माण सामग्रीको मूल्यमा पनि निरन्तर वृद्धि भइरहेको उल्लेख गरिएको छ । विज्ञप्तिअनुसार बजारमा निर्माण सामग्रीको अभावसमेत देखिन थालेको छ, जसले गर्दा निर्माण कार्य ठप्प हुने अवस्था सिर्जना भएको छ । साथै देशका विभिन्न स्थानमा देखिएको क्रसर उद्योगसम्बन्धी समस्याले पनि निर्माण क्षेत्रलाई थप प्रभावित बनाएको संघको भनाइ छ ।

संघले यसअघि नै केन्द्रीय महासंघमार्फत नेपाल सरकार तथा सम्बन्धित निकायलाई पटक पटक ध्यानाकर्षण गराए पनि हालसम्म समस्या समाधानका लागि ठोस कदम चालिएको छैन् । निर्माण व्यवसायीहरूका अनुसार ठेक्काको मूल्य समायोजन राष्ट्र बैंकको मूल्य सूचकांकका आधारमा हुने प्रावधान भए पनि वास्तविक बजार मूल्य र सूचकांकबीच ठूलो अन्तर देखिएको छ ।

बजारमा निर्माण सामग्रीको मूल्य अत्यधिक बढ्दा पनि सूचकांकमा घटेको देखाइने अवस्थाले व्यवसायीहरू थप समस्यामा परेका छन् । संघले निर्माण कार्य तीव्र हुने समयमा यस्तो मूल्यवृद्धि र अभावले व्यवसायीहरूमा ठूलो आर्थिक भार परेको भन्दै निर्माण क्षेत्रमा आपतकाल घोषणा गर्न सरकारसँग माग गरेको छ ।

साथै मूल्य समायोजनसम्बन्धी हालको कानुनी व्यवस्था अपर्याप्त रहेको भन्दै “मूल्य समायोजन मार्गनिर्देशिका २” तत्काल जारी गर्नुपर्ने माग पनि गरिएको छ । साथै, सबै अवधिका ठेक्कामा मूल्य समायोजनको व्यवस्था गरी मूल्यवृद्धिबाट प्रभावित निर्माण व्यवसायीहरूको समस्या तत्काल सम्बोधन गर्न संघले सरकारसँग आग्रह गरेको छ ।