चन्द्र ज्योति मा.वि.का विद्यार्थीलाई चिया विशेष अभिमुखीकरण

बैशाख ४, सोलुखुम्बु । चन्द्र ज्योति माध्यमिक विद्यालयका विद्यार्थीहरूका लागि चिया विषयक एकदिने विशेष अभिमुखीकरण कार्यक्रम सम्पन्न भएको छ। हिमालयन प्रोजेक्टको आयोजनामा सम्पन्न कार्यक्रमले विद्यार्थीहरूलाई चिया उत्पादन र यसको सम्भावनाबारे व्यावहारिक ज्ञान दिलाएको छ । कार्यक्रममा सहभागी विद्यार्थीहरूले विभिन्न सर्वेक्षणमा सहभागिता जनाउनुका साथै चिया चाख्ने (टी टेस्टिङ) र फ्याक्ट्री अवलोकन गरेका थिए।

यसबाट उनीहरूले चिया उत्पादनको सम्पूर्ण प्रक्रिया नजिकबाट बुझ्ने अवसर पाएका छन् । हिमालयन प्रोजेक्टका कार्यकारी निर्देशक कुर्ट लम्बर्ग (पापा कुर्ट)ले भकान्जे क्षेत्रमा चियाको प्रचुर सम्भावना रहेको उल्लेख गर्दै यसको व्यावसायिक विकासमा जोड दिनुपर्ने बताउनुभयो । उनले नयाँ पुस्तालाई विदेशमुखी हुनुभन्दा आफ्नै गाउँमा आधारित कृषि उद्यममार्फत आत्मनिर्भर बन्न आग्रह गरे। गत वर्षदेखि विद्यालयमा चिया विषयको अध्ययन–अध्यापन सुरु भइसकेको छ। विद्यार्थीहरूमा यसप्रति बढ्दो चासोलाई मध्यनजर गर्दै हिमालयन प्रोजेक्टले चिया अध्ययनका लागि विशेष प्रयोगशाला निर्माण गर्ने योजना अघि बढाएको जनाएको छ ।