खोटाङमा अटो पल्टिँदा दुई जना घाइते, एकको अवस्था गम्भीर

बैशाख ५, साेलुखुम्बु ।  खोटाङको दिक्तेल रुपाकोट मझुवागढी नगरपालिका–७ कार्तिकेस्थित मध्य पहाडी लोकमार्गमा अटो दुर्घटना हुँदा एक बालक गम्भीर घाइते भएका छन् भने एक जना महिला सामान्य घाइते भएकी छन्। शनिबार (आज) बिहान करिब ८ः३० बजे बुवालुङबाट दिक्तेलतर्फ आउँदै गरेको प्र.०१–०२–००४ ह ९५७४ नम्बरको अटो आफैं अनियन्त्रित भई सडकबाट पल्टिँदा दुर्घटना भएको हो। दुर्घटनामा दिक्तेल रुपाकोट मझुवागढी नगरपालिका–८ बुवालुङकी २३ वर्षीया अस्मिता बानिया घाइते भएकी छन्।

उनको हात र खुट्टामा चोट लागेको छ र अवस्था सामान्य रहेको जनाइएको छ। त्यसैगरी, बानियाकै ४ वर्षीय छोरा करण बानिया टाउको र अनुहारमा चोट लागेर अवस्था गम्भीर रहेको जिल्ला प्रहरी कार्यालय खोटाङले जनाएको छ । उनको जिल्ला अस्पताल खोटाङमा उपचार भइरहेको प्रहरीले जनाएको छ।अटो चालक सोही स्थानका २६ वर्षीय चन्द्र बूढाथोकीलाई प्रहरीले नियन्त्रणमा लिएको छ। दुर्घटनामा संलग्न अटो पनि जिल्ला प्रहरी कार्यालयको नियन्त्रणमा राखिएको छ ।

प्रहरी बिट रत्नपार्कबाट प्रहरी नायब निरीक्षक राजेश खड्काको कमाण्डमा खटिएको टोलीले घटनास्थलमा पुगेर आवश्यक अनुसन्धान तथा उद्धार कार्य सम्पन्न गरेको जनाएको छ। दुर्घटना स्थल दिक्तेलबाट करिब १५ किलोमिटर उत्तर–पूर्वमा पर्छ। दुर्घटनाको कारणबारे थप अनुसन्धान भइरहेको प्रहरीले जनाएको छ ।