५१ वर्षीय फुर दिकीको ल्होत्से चढ्ने चाहाना

बैशाख ४, साेलुखुम्बु ।  नेपाली आरोही फूर दिकी शेर्पा सन् २०२६ को वसन्त ऋतुमा विश्वको चौथो अग्लो हिमाल ल्होत्से (८,५१६ मिटर) सबैभन्दा छोटो समयमा आरोहण गर्ने लक्ष्यसहित तयारीमा जुटेकी छन्। शनिबार काठमाडौंको महाकालस्थित क्रिम्पान्जी एड्भेन्चर हबमा आयोजित पत्रकार सम्मेलनमा उनले बेस क्याम्पदेखि शिखरसम्म पुगेर पुनः बेस क्याम्प फर्किने गरी २४ घण्टाभित्र आरोहण सम्पन्न गर्ने योजना सार्वजनिक गरिन्।

यसअघि उनी सगरमाथा सफलतापूर्वक आरोहण गर्ने पहिलो एकल (विधवा) महिलामध्ये एक हुन् । कार्यक्रममा मिङ्मा ग्याबु शेर्पाले नेपाल सम्भावनाले भरिएको देश भएको उल्लेख गर्दै हिमालमार्फत विश्वलाई चिनाउन सकिने बताए । त्यस्तै, फुर गेल्जे शेर्पा ले शेर्पा समुदायले नेपालको पहिचान विश्वभर फैलाउन महत्वपूर्ण भूमिका खेलेको धारणा राखे ।

खुम्बु पासाङ ल्हामु गाउँपालिका–४ का वडा अध्यक्ष लक्ष्मण अधिकारी ले शेर्पाको अभियान सफलताको कामना गर्दै एकल महिलाहरूको हितका लागि स्थानीय तहबाट पहल गरिने बताए। वरिष्ठ पर्यटन व्यवसायी आङ छिरिङ शेर्पा ले पनि अभियानलाई समर्थन जनाए। ५१ वर्षीया शेर्पाले आफ्नो यो अभियान स्वर्गीय बुबा आङ ङिमा शेर्पा र मित्र इमान सिंह गुरुङको सम्झनामा समर्पित गरेकी छन्। “बुबाको अधुरो सपना पूरा गर्न ल्होत्से आरोहण गर्न लागेकी हुँ,” उनले भनिन्।

शिखरसम्म उनीहरूको तस्बिर लैजाने योजना पनि उनले सुनाइन्। आगामी अप्रिल २२ मा काठमाडौंबाट लुक्लातर्फ प्रस्थान गर्ने तयारीमा रहेकी शेर्पाले सन् २०१९ मे २३ मा नीमा डोमा शेर्पासँगै सगरमाथा आरोहण गरेकी थिइन्। सोलुखुम्बुको डिङबोचे निवासी उनले हालसम्म अमादब्लम, हिमलुङ हिमाल, आइल्याण्ड पिक, लोबुचे पिक, मेरा पिक, चुलु फार इस्ट, पोकलदे र पाल्दोर पिक लगायतका हिमाल सफलतापूर्वक आरोहण गरिसकेकी छन्। उनले आफ्नो अभियानमार्फत विश्वभरका महिलालाई कठिन परिस्थितिमा पनि सपना पूरा गर्न प्रेरित गर्ने लक्ष्य राखेकी छन्।