साेलुका प्रहरी सहायक हवलदार दिनेश कार्की चैत्रको उत्कृष्ठ प्रहरी

बैशाख ४, सोलुखुम्बु । जिल्ला प्रहरी कार्यालय सोलुखुम्बुले उत्कृष्ट कार्यसम्पादन गर्ने प्रहरी कर्मचारीलाई ‘महिनाको उत्कृष्ट प्रहरी’ घोषणा गर्ने क्रममा प्रहरी सहायक हवल्दार दिनेश कार्कीलाई २०८२ साल चैत महिनाको उत्कृष्ट प्रहरी घोषणा गरेको छ । कार्कीले सामुदायिक लघुवित्तीय संस्था लिमिटेड, सल्लेरी शाखामा कार्यरत रहँदा ३८ लाख १ हजार ५ सय ८२ रुपैयाँ अपचलन गरी फरार रहेका २६ वर्षीय सन्तोष मगरलाई पक्राउ गर्न महत्वपूर्ण भूमिका निर्वाह गरेका थिए। उनलाई २०८२ चैत २० गते सिन्धुलीको कमलामाई नगरपालिका–५ मधुटारबाट पक्राउ गरिएको हो । त्यसैगरी, ओखलढुंगाको मानेभञ्ज्याङ गाउँपालिका–८ घर भई हाल सल्लेरी बस्दै आएका ८ वर्षीय बिबश राई हराएको घटनामा पनि कार्कीले सक्रियतापूर्वक खोजतलास गरी चैत १८ गते सकुशल फेला पारेर अभिभावकको जिम्मा लगाएका थिए । प्रहरीका अनुसार कार्कीले विभागीय निर्देशनको पूर्ण पालना गर्दै उच्च मनोबल, साहस र कर्तव्यनिष्ठाका साथ जिम्मेवारी निर्वाह गर्दै आएका छन्। अपराध नियन्त्रण तथा अनुसन्धानमा उल्लेखनीय योगदान पु¥याउनुका साथै सर्वसाधारणमा शान्ति सुरक्षाको अनुभूति दिलाउने कार्यमा समेत उनको भूमिका प्रशंसनीय रहेको जनाइएको छ । उक्त योगदानको उच्च मूल्यांकन गर्दै जिल्ला प्रहरी कार्यालय सोलुखुम्बुले उनलाई ‘महिनाको उत्कृष्ट प्रहरी’ घोषणा गरेको हो।