ओखलढुंगा प्रशासनले सार्वजनीक विदामा पनि सेवा दिने

बैशाख ७, सोलुखुम्बु । जिल्ला प्रशासन कार्यालय ओखलढुंगाले सार्वजनिक बिदाका दिनमा समेत अत्यावश्यक सेवा सञ्चालन गर्ने भएको छ । कार्यालयले शुक्रबार जारी गरेको सूचनामार्फत नागरिकता, राहदानी तथा राष्ट्रिय परिचयपत्र सम्बन्धी सेवा अब बिदाका दिनमा पनि उपलब्ध गराइने जनाएको हो ।

नेपाल सरकारको निर्णयअनुसार विभिन्न पर्व, दिवस तथा जयन्तीका अवसरमा पर्ने सार्वजनिक बिदामा पनि सेवाग्राहीलाई सहज रूपमा सेवा प्रदान गर्ने उद्देश्यले यस्तो व्यवस्था गरिएको प्रशासकीय अधिकृत रोशन श्रेष्ठले जानकारी दिए । उनका अनुसार नागरिकलाई सेवा प्रवाहमा कुनै अवरोध नहोस् भन्ने लक्ष्यसहित विशेष व्यवस्था मिलाइएको हो । कार्यालयका अनुसार वैशाख १८ गते पर्ने चण्डी पूर्णिमा, जेठ १५ गते गणतन्त्र दिवस, भदौ १२ गते रक्षा बन्धन, भदौ १९ गते श्रीकृष्ण जन्माष्टमी र असोज २५ गते घटस्थापना लगायतका सार्वजनिक बिदाका दिनमा पनि सेवा सञ्चालन हुनेछ ।

यसैगरी पुस महिनामा पर्ने धान्य पूर्णिमा, क्रिसमस डे, तमु ल्होसार, पृथ्वी जयन्ती, माघे सङ्क्रान्ति, सोनाम ल्होसार तथा फागुन महिनामा पर्ने प्रजातन्त्र दिवस, अन्तर्राष्ट्रिय महिला दिवस, घ्याल्पो ल्होसार र मुस्लिम समुदायका ईद तथा बकर ईदका दिनमा पनि सेवा निरन्तर उपलब्ध हुने जनाइएको छ । कार्यालयले सार्वजनिक बिदाका दिनमा पनि नागरिकता, राहदानी र राष्ट्रिय परिचयपत्रसम्बन्धी सेवा नियमित रूपमा सञ्चालन गर्ने जनाएको छ ।

यस व्यवस्थाले बिदाका कारण सेवा लिनबाट वञ्चित हुने समस्याको अन्त्य हुने अपेक्षा गरिएको छ । सेवाग्राहीलाई तोकिएको मिति र समयमै आवश्यक कागजातसहित उपस्थित भई सेवा लिन कार्यालयले अनुरोध गरेको छ । यसैबीच, यातायात व्यवस्था कार्यालयले पनि सार्वजनिक बिदाका दिनमा सेवा सञ्चालन गर्ने जानकारी दिँदै सेवाग्राहीलाई सहजता प्रदान गर्ने जनाएको छ ।