साेलुखुम्बुकाे महाकुलुङ गाउँपालिकालाई नगरपालिका बनाउने प्रस्ताव

बैशाख ९, सोलुखुम्बु । संघीय मामिला तथा सामान्य प्रशासन मन्त्रालयमा देशभरका स्थानीय तहको संख्या र सीमा हेरफेरसम्बन्धी झण्डै ९७ प्रस्ताव पेश भएका छन्। ती प्रस्तावहरूको अध्ययन गर्दै नेपाल नगरपालिका संघले केही गाउँपालिकाहरूलाई नगरपालिका बनाउने सिफारिस गरेको छ ।

यसै सन्दर्भमा सोलुखुम्बुको महाकुलुङ गाउँपालिका पनि नगरपालिका बन्न उपयुक्त स्थानीय तहको सूचीमा परेको छ। अध्ययन अनुसार हिमाली भेगमा न्यूनतम १० हजार जनसंख्या पुगेका तथा आर्थिक गतिविधि र सम्भावना भएका गाउँपालिकाहरूलाई नगरपालिकामा स्तरोन्नति गर्न सकिने निष्कर्ष निकालिएको हो ।

प्रतिवेदनले केवल जनसंख्या मात्र नभई जनघनत्व, आर्थिक गतिविधि र चलायमान जनसंख्यालाई पनि आधार मान्नुपर्ने सुझाव दिएको छ। महाकुलुङसहित देशभरका ३१ गाउँपालिकालाई सम्भावित रूपमा नगरपालिका बनाउन सकिने उल्लेख गरिएको छ । यस प्रस्ताव अनुसार भविष्यमा स्थानीय तह पुनर्संरचना गर्दा महाकुलुङलाई पनि नगरपालिका बनाउने सम्भावना देखिएको छ, जसले सेवा प्रवाह, पूर्वाधार विकास र स्थानीय आर्थिक गतिविधिलाई थप मजबुत बनाउन सहयोग पुग्ने अपेक्षा गरिएको छ ।