उदयपुरमा सांसद तामाङको उपस्थितिमा शुभकामना आदानप्रदान तथा धन्यवाद ज्ञापन कार्यक्रम

बैशाख ९, सोलुखुम्बु । राष्ट्रिय स्वतन्त्र पार्टी (रास्वपा) का सांसद सूर्य बहादुर तामाङको उपस्थितिमा उदयपुरको ताप्ली गाउँपालिकामा शुभकामना आदानप्रदान तथा धन्यवाद ज्ञापन कार्यक्रम सम्पन्न भएको छ। कार्यक्रममा ताप्ली गाउँपालिकाका जनप्रतिनिधि, कर्मचारी, समाजसेवी तथा स्थानीय भद्रभलाद्मीहरूको उल्लेखनीय उपस्थिति रहेको थियो।

सो अवसरमा कर्मचारीहरूले आफ्ना विभिन्न समस्या तथा करार कर्मचारी व्यवस्थापनका विषयमा सांसद तामाङको ध्यानाकर्षण गराउँदै हालको सरकारबाट विशेष योजना र प्रभावकारी व्यवस्थापनको माग गरेका थिए। कार्यक्रमलाई सम्बोधन गर्दै सांसद तामाङले ताप्ली गाउँपालिका मात्र नभई समग्र उदयपुर जिल्लाको विकास निर्माणका कार्यमा कुनै किसिमको कमजोरी वा चुहावट हुन नदिन सबै पक्षबीच सहकार्य र हातेमालो आवश्यक रहेको बताए।

उनले पारदर्शिता र उत्तरदायित्वलाई प्राथमिकतामा राख्दै विकासका काम अघि बढाउनुपर्ने धारणा व्यक्त गरे। यसै अवसरमा नवनिर्वाचित संघीय सांसद तामाङलाई शुभकामना व्यक्त गर्दै गाउँपालिका अध्यक्षले ताप्लीको समृद्धि र विकासका लागि आगामी दिनमा समन्वय र सहकार्य गर्दै अघि बढ्नुपर्ने आवश्यकता औंल्याए। साथै, अध्यक्षद्वारा ४७ वटा शीर्षक अन्तर्गतका योजनाहरू समेटिएको मागपत्र पनि सांसद तामाङलाई हस्तान्तरण गरिएको थियो।  उनले कोशी कोरिडोर घुर्मि कुमालटार कुनाइघाट सडक समेत अबलोकन गरेका छन् ।कार्यक्रमले स्थानीय तह र संघीय प्रतिनिधिबीच समन्वय सुदृढ गर्दै विकासका एजेन्डालाई प्रभावकारी रूपमा अघि बढाउने अपेक्षा गरिएको छ।