हर्क साम्पाङबाट यलम्बरको शालीक उद्‌घाटन गर्दै बुइपा

बैशाख १०, सोलुखुम्बु । निर्माण सम्पन्न भएपछि पनि लामो समय अलपत्र बनेको बुइपा स्थीत यलम्बरको मूर्ति हर्क साम्पाङले उद्‌घाटन गर्ने भएका छन् ।  खोटाङको दिक्तेल रुपाकोट मझुवागढी नगरपालिका वडा नम्बर १४ बुइपामा निर्माण गरिएको किराँती राजा यलम्बरको १ सय १० फिट अग्लो मुर्ति प्रतिनिधिसभा सदस्य तथा श्रम संस्कृति पार्टीका अध्यक्ष हर्क साम्पाङले उद्‌घाटन गर्ने भएका हुन् ।  किराँतीहरूको मुख्य चाड मानीने उभौलिको अवसरमा आगामी बैशाख १८ गते बुइपामा मूर्ति उद्‌घाटन हुने जनाइएको छ ।

कोशी प्रदेश नामाकरण विरुद्धको विरोध स्वरुप उद्घाटन गर्न नदिइएको उक्त सालीक साम्पाङबाट हुने भएको छ ।  सालिक उद्घाटन बारे सोल्मास्थित शुभम् फाउण्डेसनमा बैशाख ९ गते पत्रकार सम्मेलन गरी जानकारी गराइएको हो । किरात राई यायोक्खाका केन्द्रीय महासचिव भीम राईका अनुसार कोशी प्रदेश नामाङ्कनको पक्षमा हस्ताक्षर गर्ने कोशी प्रदेशका ८२ सांसदहरू र पहिचान पक्षधरहरूको विरुद्धमा उभिने तत्कालीन प्रधानमन्त्री केपी शर्मा ओली, महेश बस्नेत र योगेश भट्टराई गरी ८५ जनाको हातबाट उद्घाटन गर्न नहुने भन्दै दिक्तेल रुपाकोट मझुवागढी नगरपालिकालाई पत्राचार गरिएको थियो ।

अहिले पनि प्रदेश सांसदहरू र ओली, बस्नेत र भट्टराईलाई बहिष्कार कायमै भएकाले साम्पाङबाट उद्घाटन गराउन लागिएको राईले जनाएका छन् । साम्पाङको साथमा गायक राजेश पायल राई, नायक दयाहाङ राई लगायतको उपस्थितिमा किराती मुन्दुमी संस्कृति अनुसार उद्घाटन गर्ने तयारी गरिएको वडाअध्यक्ष दिनेश राईले बताउनुभयो । उक्त सालिक कोशी प्रदेश र दिक्तेल रूपाकोट मझुवागढी नगरपालिकाको करिब ११ करोड ५८ लाख बढीको बजेटमा निर्माण गरिएको हो ।

उमा तुवाचुङ अन्सुली जेभीले ११ करोड ५८ लाख १६ हजार चार सय ४१ रुपैयाँको बजेटमा १८ महिनाभित्र सक्ने गरी २०७८ असार २८ गते सम्झौता गरेको थियो । तर बेलामा काम नसकेपछि पटक–पटक म्याद थप गर्दै चालु आर्थिक वर्षमा सकिएको हो । कोशी प्रदेश मुख्यमन्त्री हिक्मत कुमार कार्कीले जेठ १८ गते सालिक उद्‌घाटन गर्ने भनिए पनि यायोक्खाको पत्राचारपछि स्थगित गरिएको थियो ।