फाप्लु क्षेत्रको बजार अनुगमन, १६ हजार बढीका सामाग्री जफत 

बैशाख १०, सोलुखुम्बु । हिमाली जिल्ला सोलुखुम्बुको सदरमुकाम फाप्लुबाट १६ हजार बढीको म्याद सकिएको अखाद्य सामाग्री बरामद भएको छ । विहीबार कार्यालयका सहायक प्रमुख जिल्ला अधिकारी नथा सूचना अधिकारी देवेन्द्र सुवेदीको नेतृत्वमा खटिएको बजार अनुगमन टोलीले फाप्लु क्षेत्रबाट १६ हजार बढीको म्याद गुज्रिएको खाद्य सामाग्री बरामद गरेको हो ।

 सदरमुकामको सबैभन्दा व्यस्त क्षेत्र मध्येको एक फाप्लु क्षेत्रलाई केन्द्रित गरि यहाँका १६ वटा पसल, होटल तथा व्यवसायबाट उक्त रकम बराबरको सामाग्री जफत भएको जनाइएको छ । कार्यालयले केही निजी औषधी पसल सहित जिल्ला अस्पताल, होटल, पसल अनुगमन गरेको थियो । अनुगमनका क्रममा जफत भएका सामाग्रीहरू केही दिनमा नष्ट गरिने जनाइएको छ ।  कार्यालयले बजार अनुगमनलाई नियमित र चुस्त बनाइरहेको कार्यालयका सूचना अधिकारी सुवेदीको भनाई छ ।  

उपभोक्ता स्वास्थ्यलाई प्राथमिकतामा राख्दै अखाद्य बस्तुको प्रयोग निस्तेज पार्न बजार अनुगमन नियमित गरिएको उहाँले. बताउनुभयो । अनुगमनका क्रममा दर्ता नगरी सञ्चालन गरिएका होटल तथा पसलहरूलाई चेतावनी दिइएको छ भने म्याद सकिएका, लेवलिङ नभएका लगायत सामाग्री बिक्रीवितरण गर्ने व्यवसायीहरुलाई सचेत गराइएको छ ।

यस अघि प्रशासनले सल्लेरीको आवाडाँडा क्षेत्रको बजार अनुगमन गरेको थियो ।  अनुगमनका लागी जिल्ला प्रशासन कार्यालय, घरेलु तथा साना उद्योग कार्यालय, जिल्ला प्रहरी कार्यालय, स्वास्थ्य कार्यालय, भेटेरिनरी तथा पशुसेवा केन्द्र, कृषि ज्ञान केन्द्र लगायत सरोकारवाला निकायका प्रमुख तथा प्रतिनिधिको टोली पुगेको थियो ।