तिङ्लामा सुरु भयो बृहत् निःशुल्क स्वास्थ्य शिविर

बैशाख १०, सोलुखुम्बु । सोलुखुम्बुको सोलुदुधकुण्ड नगरपालिका वडा नम्बर ११, तिङ्लामा बृहत् निःशुल्क स्वास्थ्य शिविर सुर भएको छ । ‘पाहिला पाहिलाको आशा’ संस्थाको आयोजनामा सुरु भएको उक्त शिविर तिङ्ला सोलुखुम्बु फिजियोथेरापी सेन्टरमा बिहीबारदेखि प्रारम्भ भएको हो । पाँच दिनसम्म सञ्चालन हुने शिविर बैशाख १५ गतेसम्म जारी रहनेछ ।

शिविरमा विशेषगरी फिजियोथेरापी सेवा अन्तर्गत ढाड दुख्ने, घुँडा दुख्ने, नशा च्यापिने तथा जोर्नीसम्बन्धी विभिन्न समस्याको निःशुल्क परामर्श र उपचार उपलब्ध गराइएको छ । यसका साथै स्त्रीरोग सेवा, आँखा परीक्षण, अकुपञ्चर तथा दीर्घकालीन रोगसम्बन्धी उपचार सेवा पनि प्रदान गरिँदै आएको छ । गाउँमै यस्तो सेवा उपलब्ध भएपछि स्थानीय सेवाग्राहीहरू खुसी देखिएका छन् । उनीहरूले महँगो खर्च गरेर जिल्ला बाहिर जानुपर्ने बाध्यता अन्त्य भएको बताएका छन् ।

शिविर उद्घाटन कार्यक्रममा सोलुदुधकुण्ड नगरपालिकाकी उपमेयर गान्धिमाया तामाङले नगरपालिका विभिन्न संस्थाहरूसँग सहकार्य गर्दै यस्ता कार्यक्रम सञ्चालन गर्दै आएको बताउनुभयो । वडा अध्यक्ष टंकबहादुर कार्कीले विगत वर्षहरूदेखि योजना भए पनि विभिन्न कारणले शिविर सञ्चालन गर्न नसकिएको उल्लेख गर्दै यस वर्ष कार्यक्रम सञ्चालन गर्न पाउँदा खुसी व्यक्त गर्नुभयो । उहाँले आयोजक संस्थालाई धन्यवादसमेत व्यक्त गर्नुभयो ।

त्यसैगरी ‘पाहिला पाहिलाको आशा’ संस्थाका प्रमुख डा. पासाङ काजी लामाले वडा नम्बर ११ मात्र नभई अन्य वडाहरूले पनि सहकार्य गर्न चाहेमा संस्था सधैं तयार रहेको जानकारी दिनुभयो ।