सोलुखुम्बुमा अखाद्य वस्तुकाे बिगबिगी

जेठ २८, सोलुखुम्बु । बजार अनुगमनका क्रममा सोलुखुम्बुमा अखाद्य वस्तुहरूकाे बिगबिगी बढेकाे पाइएकाेछ ।  अाज साेमबार सदरमुकाम सल्लेरीमा गरिएकाे बजार अनुगमनका क्रममा म्याद गुज्रिएका तथा  अखाद्य वस्तुहरूकाे विक्रिबितरण भइरहेकाे पाइएकाले बिगबिगी बढेकाे बताइएकाे हाे । अनुगमनका क्रममा २१ हजार रुपैयाँ बढीको अखाद्य बस्तु जफत समेत गरिएको छ । विभिन्न होटल तथा पसलहरु अनुगमन गर्ने क्रममा आज उक्त रकम बराबरका अखाद्य तथा म्याद गुज्रिएका वस्तु जफत गरिएको हो ।

सोमबार जिल्ला प्रशासन कार्यालय, सोलुदुधकुण्ड नगरपालिका, घरेलु तथा साना उद्योग कार्यालय र उद्योग वाणिज्य सङ्घको संयुक्त आयोजनामा सदरमुकाम स्थित राष्ट्रिय वाणिज्य बैंक देखि निर्वाचन कार्यालय सम्म बजार अनुगमन गरिएको थियो । बजार भरिका ३६ वटा पसल तथा होटलको अनुगमन गर्दा २१ हजार ५ सय ५० रुपैयाँ भन्दा बढी मूल्यका अखाद्य सामग्री जफत गरी नष्ट गरिएको छ ।

घरेलु तथा साना उद्योग कार्यालयका प्रमुख नारायण प्रसाद खतिवडाको नेतृत्वमा गरिएको बजार अनुगमनमा मूल्य सूची नराखेकालाई राख्न तथा पसल दर्ता गर्न समेत निर्देशन दिनुभएको छ । उक्त होटल पसलबाट चकलेट, थुक्पा, मसला, पेय पदार्थ र कस्मेटिक का सामानको म्याद नाघेका सामाग्री फेला परेको अनुगमन टोलीले जनाएको छ । आवश्यकता अनुसार जुनसुकै समयमा बजार अनुगमन गरिने र आगामी दिनमा बजार अनुगमनलाई तीव्रता दिइने प्रमुख खतिवडाको भनाई छ ।