विपद् जोखिम न्यूनीकरणमा खुम्बु पासाङल्हामुको १ करोड ४५ लाख खर्च

सबिना राई, जेठ २, सोलुखुम्बु । सोलुखुम्बुको खुम्बु पासाङल्हामु गाउँपालिकाले विपद् व्यवस्थापन तथा राहतका लागि १ करोड ४५ लाख खर्च गरेको छ । गाउँपालिकाले चालु आर्थिक वर्ष २०८२/८३ को साउनदेखि बैशाखसम्म विभिन्न विपद् व्यवस्थापन तथा राहत कार्यमा करिब १ करोड ४४ लाख ८० हजार १६ रुपैयाँ खर्च गरेको हो ।

लेखा अधिकृत चेतनाथ कटेलका अनुसार हावाहुरीबाट प्रभावितलाई राहत वितरणमा १२ लाख रुपैयाँ खर्च गरिएको छ भने थामे क्षेत्रमा विपद् व्यवस्थापन तथा राहतका लागि विनियोजित १० लाखमध्ये ५ लाख ४१ हजार ६ सय ८० रुपैयाँ खर्च भएको छ । त्यसैगरी, थामेखोला तार बन्धन निर्माणमा ४८ लाख, टोकटोक पहिरो व्यवस्थापन तथा पुनर्निर्माणमा २३ लाख ३३ हजार ४ सय ५५ रुपैयाँ, जौवारी–बुक्सा–थामडाँडा पर्यटकीय पदमार्ग निर्माणमा ४ लाख ५० हजार, छुमवा क्षेत्रमा ग्याविन निर्माणमा १२ लाख ६३ हजार, जोरसल्लेमा ग्याविन तारवार निर्माणमा १६ लाख ४१ हजार रुपैयाँ खर्च गरिएको छ ।

राङदिङ बस्ती संरक्षण तथा ग्याविन जाली निर्माणका लागि ६ लाख, थामे बस्ती पहिरो नियन्त्रण तथा तटबन्धन निर्माणमा १३ लाख ८० हजार तथा चोरक्याम्प क्षेत्रमा भेल नियन्त्रण र ड्रेन निर्माणमा २ लाख ५८ हजार ९ सय ८९ रुपैयाँ खर्च गरिएको छ । हालसम्म कुल विनियोजित बजेटको ३१ दशमलव ५५ प्रतिशत रकम खर्च भइसकेको गाउँपालिकाले जनाएको छ ।