रोशी -लुरा सडक श्रमदानमार्फत ग्राभेल, स्थानीयलाई बर्षायाममा सहज

जेठ २, सोलुखुम्बु । सोलुदुधकुण्ड नगरपालिका वडा नं. ५ अन्तर्गत रोसी हुँदै लुरा जाने सडकखण्डमा आवतजावत गर्नै कठिन भएपछि स्थानीय कृषक समूह र जनप्रतिनिधिको सक्रियतामा श्रमदानमार्फत ग्राभेल गर्ने कार्य सम्पन्न गरिएको छ । सोलुदुधकुण्ड नगरपालिका वडा नं. ५ स्थित बालु खोप कृषक समूह, सेतीदेवी महिला कृषक समूह लुरा तथा वडा अध्यक्ष मिङ्मार तामाङ को सहयोगमा शनिबार सडक मर्मत तथा ग्राभेलको काम सम्पन्न गरिएको हो । स्थानीयवासीका अनुसार वर्षायाममा हिलाम्मे र जोखिमपूर्ण बन्ने उक्त सडकमा सवारीसाधन सञ्चालन र सर्वसाधारणको आवतजावतमा समस्या हुँदै आएको थियो। सडकलाई सहज र सुरक्षित बनाउन स्थानीयस्तरमै श्रमदान अभियान सञ्चालन गरिएको बताइएको छ ।

श्रमदान तथा ग्राभेल कार्यमार्फत करिब ८० हजार रुपैयाँ बराबरको काम सम्पन्न भएको कृषक पासाङ लामा ले जानकारी दिएका छन्। स्थानीयले सामूहिक पहलमार्फत सडक सुधार गरिनु सकारात्मक उदाहरण भएको भन्दै यस्ता अभियानले गाउँस्तरको विकासमा ठूलो योगदान पुग्ने विश्वास व्यक्त गरेका छन्।