कामिरिता शेर्पा ३२औँ पटक सगरमाथा शिखरमा

जेठ ३, सोलुखुम्बु । कामिरिता शेर्पाले ३२औँ पटक सगरमाथा आरोहण गर्नुभएको छ । प्रसिद्ध पर्वतारोही कामिरिता शेर्पाले ३२औँ पटक सगरमाथाको शिखरमा पुगेर विश्वको सर्वोच्च हिमाल सर्वाधिक पटक चढेको आफ्नै कीर्तिमान तोड्नुभएको हो । सोलुखुम्बुको थामे गाउँका ५६ वर्षीय शेर्पा आज बिहान १० बजेर १२ मिनेटको सगरमाथाको चुचुरोमा पुग्नुभएको पर्यटन विभागका निर्देशक हिमाल गौतमले जानकारी दिनुभयो ।

’एभरेस्ट म्यान’ पनि भनेर चिनिने शेर्पा पहिलो पटक सन् १९९४ मा विश्वको सर्वोच्च शिखरमा पुग्नुभएको थियो । ३२औँ पटक सफल आरोहणपछि कामिरिता र उहाँको टोली अहिले आधार शिविरतर्फ ओर्लिने क्रममा रहेको सेभेन समिट ट्रेक्स जनाएको छ । शेर्पाले सन् २०२३ र सन् २०२४ मा एकै याममा दुई पटक सगरमाथा आरोहण गर्नुभएको थियो ।