पत्रकारितामा एआई प्रयोगबारे सोलुखुम्बुमा तीन दिने तालिम सुरु

जेठ ४, सोलुखुम्बु । सोलुखुम्बुको सदरमुकाम सल्लेरीमा “पत्रकारितामा एआई कार्यक्षमता अभिवृद्धि” सम्बन्धी तीन दिने तालिम सुरु भएको छ । पत्रकारितामा एआईको भरपर्दो तथा प्रभावकारी प्रयोगबारे क्षमता विकास गर्ने उद्देश्यले कार्यक्रम आयोजना गरिएको हो । नेपाल पत्रकार महासंघ सोलुखुम्बु शाखाको आयोजनामा सुरु भएको तालिममा जिल्लाका सक्रिय २० जना भन्दा बढी पत्रकार सहभागी छन् ।

उद्घाटन कार्यक्रमको अध्यक्षता महासंघ सोलुखुम्बुका अध्यक्ष सुवास दर्नालले गर्नुभएको छ भने, प्रमुख अतिथिका रूपमा प्रमुख जिल्ला अधिकारी लिला केसी पाण्डे रहनुभएको थियो । उद्घाटन कार्यक्रममा प्रमुख जिल्ला अधिकारी पाण्डेले पत्रकारितामा एआई प्रविधि उपयोगी बन्दै गएको उल्लेख गर्दै यसको प्रयोगलाई राज्यले अझै नीतिगत रूपमा व्यवस्थित बनाउन आवश्यक रहेको बताउनुभयो ।

उहाँले प्रविधिको सही प्रयोगले सूचना प्रवाहलाई प्रभावकारी र छिटो बनाउन सहयोग पुग्ने धारणा राख्नुभयो । कार्यक्रममा नेपाल पत्रकार महासंघ सोलुखुम्बुका अध्यक्ष सुबास दर्नालले एआई पत्रकारिता आजको आवश्यकता भएको उल्लेख गर्दै यसको दुरुपयोगभन्दा सदुपयोगमा सबैले ध्यान दिनुपर्ने बताउनुभयो ।

तालिममा प्रशिक्षक अजय शर्माले एआई प्रविधिको सुरक्षित, जिम्मेवार र व्यावसायिक प्रयोगबारे सहजीकरण गरिरहनुभएको छ । कार्यक्रममा समाचार लेखन, डिजिटल सामग्री उत्पादन तथा पत्रकारितामा एआईको प्रयोगका विविध पक्षबारे प्रशिक्षण दिइने आयोजकले जनाएको छ ।