फाप्लुलाई बालमैत्री वडा बनाउने तयारी सुरु, पहिलो चरणको अभिमुखिकरण सम्पन्न

जेठ ४, साेलुखुम्बु । सोलुखुम्बुको सोलुदुधकुण्ड नगरपालिका–४ फाप्लुलाई बालमैत्री स्थानीय शासनयुक्त वडा घोषणा गर्ने तयारी औपचारिक रूपमा सुरु गरिएको छ । बालबालिकाको अधिकार संरक्षण, सुरक्षित वातावरण निर्माण र बालमैत्री समाज विकास गर्ने उद्देश्यसहित पहिलो चरणको अभिमुखीकरण कार्यक्रम सम्पन्न गरिएको हो ।

“बालबालिकामा लगानी, सबैको सरोकार ः बालमैत्री नगर, विकास र समृद्धिको आधार” भन्ने मूल नारासहित आयोजित कार्यक्रममा स्थानीय जनप्रतिनिधि, सरोकारवाला निकाय, अभिभावक तथा समुदायका प्रतिनिधिहरूको सहभागिता रहेको थियो । कार्यक्रममा बालअधिकार संरक्षण, बालमैत्री वातावरण निर्माण, बालश्रम तथा हिंसा न्यूनीकरण, गुणस्तरीय शिक्षा र बाल सहभागिताको विषयमा विस्तृत छलफल गरिएको जनाइएको छ ।

अभिमुखीकरण कार्यक्रममा बोल्दै वडा अध्यक्ष युवास तामाङले बालमैत्री वडा निर्माण केवल घोषणा गर्ने प्रक्रिया मात्र नभई बालबालिकाको भविष्य सुरक्षित गर्ने दीर्घकालीन अभियान भएको बताउनुभयो । उहाँले आगामी असोज महिनाभित्र वडा नम्बर ४ लाई बालमैत्री वडा घोषणा गर्ने लक्ष्यसहित आवश्यक सूचकहरू पूरा गर्न सबै पक्षको सहकार्य आवश्यक रहेको उल्लेख गर्नुभयो ।

कार्यक्रममा सहभागी सरोकारवालाहरूले बालबालिकामैत्री नीति, सुरक्षित खेलमैदान, विद्यालय सुधार, स्वास्थ्य पहुँच र बाल संरक्षणका मापदण्ड कार्यान्वयनमा सामूहिक प्रतिबद्धता व्यक्त गरेका छन् ।

स्थानीय तहले बालमैत्री स्थानीय शासन कार्यविधिअनुसार आवश्यक सूचक पूरा गर्दै फाप्लुलाई जिल्लाकै नमुना बालमैत्री वडा बनाउने तयारी अघि बढाएको जनाएको छ ।