गार्मा माविका विद्यार्थीलाई ट्राफिक सचेतना

जेठ ४, सोलुखुम्बु । सोलुखुम्बुको सोलुदुधकुण्ड नगरपालिका–७ गार्मामा विद्यार्थीलाई लक्षित गर्दै सवारी दुर्घटना न्यूनीकरण तथा ट्राफिक सचेतना सम्बन्धी अभिमुखीकरण कार्यक्रम सम्पन्न गरिएको छ ।

जिल्ला ट्राफिक प्रहरी कार्यालय सोलुखुम्बुको आयोजनामा गार्मा माध्यमिक विद्यालयका कक्षा ९ र १० मा अध्ययनरत विद्यार्थीहरूलाई ट्राफिक नियम, सडक सुरक्षाका आधारभूत उपाय तथा दुर्घटना न्यूनीकरणका विषयमा जानकारी गराइएको हो ।

कार्यक्रममा जिल्ला ट्राफिक प्रहरी कार्यालय सोलुखुम्बुका सूचना अधिकारी चन्द्र बस्नेतले पछिल्लो समय बढ्दो सवारी चापसँगै दुर्घटनाका घटना पनि बढ्दै गएको उल्लेख गर्दै दुर्घटना न्यूनीकरणका लागि विद्यालय तहबाटै सचेतना आवश्यक रहेको बताउनुभयो । उहाँका अनुसार अधिकांश दुर्घटना मानवीय लापरबाही, ट्राफिक नियम उल्लंघन, तीव्र गति तथा सडक प्रयोगसम्बन्धी न्यून जानकारीका कारण हुने गरेका छन् ।

“विद्यार्थी आजका मात्रै होइनन्, भोलिका चालक, यात्रु र जिम्मेवार नागरिक पनि हुन्,” सूचना अधिकारी बस्नेतले भन्नुभयो, “उनीहरूलाई प्रारम्भिक चरणमै ट्राफिक नियमबारे सचेत गराउन सकियो भने दीर्घकालीन रूपमा दुर्घटना न्यूनीकरणमा सकारात्मक प्रभाव पर्छ ।”

अभिमुखीकरणका क्रममा सडक पार गर्ने सही तरिका, सवारी साधन चढ्दा अपनाउनुपर्ने सावधानी, हेल्मेट र सिटबेल्टको प्रयोग, जेब्राक्रसिङको महत्व तथा ट्राफिक संकेतहरूको प्रयोगात्मक जानकारी दिइएको थियो ।

ट्राफिक प्रहरीले विद्यार्थीमार्फत घरपरिवार र समुदायसम्म पनि सडक सुरक्षा सम्बन्धी सन्देश पुग्ने विश्वास लिएको छ । विद्यालयस्तरमै ट्राफिक शिक्षा प्रभावकारी बनाउन सके दुर्घटनाबाट हुने मानवीय तथा आर्थिक क्षति कम गर्न सहयोग पुग्ने सरोकारवालाहरूले बताएका छन् ।