सोताङमा अभिभावक सिकाइ मेला सम्पन्न 

जेठ ७, सोलुखुम्बु । सोलुखुम्बुको सोताङ गाउँपालिकाले प्रारम्भिक बालविकास लागी अभिभावक सिकाइ मेला २०८३ सम्पन्न गरेको छ ।  जिल्लामै पहिलोपटक गाउँपालिकाले पालिकाको शिक्षा क्षेत्रमा सक्रिय सेतो गुराँस संस्थाको सहकार्यमा मेला सम्पन्न गरेको हो । बालबालिकाको प्रारम्भिक बालविकासको क्षेत्रमा अभिभावकलाई सचेत गराउँदै सचेत नागरिक उत्पादन गर्ने हेतुले मेलाको आयोजना गरिएको थियाे ।  

मेलामा गाउँपालिका क्षेत्र भित्र रहेका २० वटा सामुदायिक विद्यालयहरूको सहभागिता रहेको थियो भने यि विद्यालयका २ हजार बढी विद्यार्थीले मेलामा उपस्थिति जनाएका थिए ।  वडा नम्बर १ का अध्यक्ष जङ्ग गुरुङको अध्यक्षता एवं गाउँपालिका अध्यक्ष खिलाराज बस्नेतको प्रमुख आतिथ्यतामा सम्पन्न मेलामा विद्यालयहरूले सिकाइ सामाग्री तथा प्रयोगात्मक सामाग्रीहरूको प्रतिस्पर्धात्मक स्टलहरू राखेका थिए । स्टलहरुमा विद्यालयमा प्रयोग हुने शैक्षणिक सामाग्री, वास्तुकला, हस्तकलाका सामाग्री, परम्परागत घरायसी प्रयोजनका सामाग्रीहरू लगायतको प्रदर्शनी समेत गरिएको थियो ।  प्रदर्शनीमा राखिएका विद्यालयका २० स्टल मध्येबाट उत्कृष्ट ४ वटालाई पुरस्कृत समेत गरिएको छ ।  

मेलाको अवसरमा बोल्दै गाउँपालिका अध्यक्ष खिलाराज बस्नेतले बालबालिकालाई सही दिशानिर्देश गर्न सके भविष्यको गाउँपालिका सोचेभन्दा धेरै बौद्धिक गाउँपालिका बन्न सक्ने बताउनुभयो । उहाँले गाउँपालिकाले शिक्षा क्षेत्रमा सहरमा रहेका सुविधा सम्पन्न विद्यालय जस्तै नयाँ नयाँ कामहरू गरिएको उल्लेख गर्दै यसको नतिजाहरू पनि आइरहेको बताउनुभएको थियो ।