देउसाको सार्वजनिक सुनुवाई सम्पन्न, थुलुङका सबै वडामा हुने 

जेठ २१, सोलुखुम्बु ।  सोलुखुम्बुको थुलुङ दुधकोशी गाउँपालिकाको सार्वजनिक सुनुवाई प्रारम्भ भएको छ ।  गाउँपालिकाको आयोजनामा पालिकाका ९ वटै वडामा हुने सार्वजनिक सुनुवाई वडा नम्बर ७ देउसाबाट सुरुआत भएको हो ।  विहीबार देउसाका वडा अध्यक्ष भोजराज कार्कीको अध्यक्षतामा वडाको सार्वजनिक सुनुवाई सम्पन्न भएको छ ।

 उक्त सार्वजनिक सुनुवाईमा वडाबाट चालु आर्थिक वर्ष २०८२/८३ मा वडामा कार्यान्वयन भएका निती कार्यक्रम र बजेटमा बारेमा सुनुवाई गरिएको छ । देउसामा यस आर्थिक वर्षका लागी रेडियो एभेष्टको सहजिकरणमा भएको उक्त कार्यक्रमका अध्यक्ष कार्कीले वडाले यस आर्थिक वर्षमा वडाभित्र सञ्चालन गरेका योजना तथा कार्यक्रमहरूको बारेमा विस्तृत जानकारी गराउनुभएको थियो । उहाँले वडामा यस वर्ष करिव १ कराेड ८५ लाख बराबरकाे बजेट कार्यान्वयन गरिएकाे बताउनुभयाे ।  

अध्यक्ष कार्कीले सुनुवाईमा सहभागीहरुबाट उठेका जिज्ञासाको जवाफ दिँदै वडाले यस वर्ष विभिन्न आरोह अवरोहका बाबजुद मनग्य काम गर्न सफल भएको दावी गर्नुभयो ।  बजेट अभावका बाबजुद प्राप्त श्रोतलाई समुचित ढङ्गबाट वितरण गरिएको उहाँको जिकिर थियो । सार्वजनिक सुनुवाईमा वडाका स्थानीय, राजनैतिक दलका प्रमुख तथा प्रतिनिधि, वडा सदस्यहरू, विद्यालयका प्रअ एवं सरोकारवालाहरूको उपस्थिति थियो ।