सल्लेरीमा स्थानीय आर्थिक विकासको योजना क्षेत्र पहिचान तथा कार्ययोजना प्रशिक्षण सुरु

सबिना राई, सोलुखुम्बु, जेठ २२ । हिमाली जिल्ला सोलुखुम्बुको सदरमुकाम सल्लेरीमा स्थानीय आर्थिक विकासको योजना क्षेत्र पहिचान तथा कार्ययोजना सम्बन्धी प्रशिक्षण कार्यक्रम सुरु भएको छ । स्थानीय विकास प्रशिक्षण प्रतिष्ठान र लोकल डेभलोप्मेन्ट ट्रेनिङ एकेडेमीको सहकार्य तथा सोलुदुधकुण्ड नगरपालिकाको आयोजनामा शुक्रबारदेखि प्रशिक्षण कार्यक्रम सञ्चालन भएको हो ।

जेठ २२ गतेदेखि २५ गतेसम्म सञ्चालन हुने उक्त कार्यक्रममा स्थानीय आर्थिक विकासका सम्भावित क्षेत्रहरूको पहिचान, कार्ययोजना निर्माण तथा कार्यान्वयनका विषयमा सहभागीहरूलाई प्रशिक्षण दिइनेछ । कार्यक्रमका प्रमुख उद्देश्यहरूमा सोलुदुधकुण्ड नगरपालिकाको स्थानीय आर्थिक विकासको वर्तमान अवस्थाको विश्लेषण, स्थानीय आर्थिक विकासका योजना क्षेत्रहरूको पहिचान, कार्यान्वयनयोग्य कार्ययोजनाको प्रारम्भिक खाका तयार पार्ने तथा त्यसलाई प्रभावकारी रूपमा अगाडि बढाउन स्थानीय आर्थिक विकास संवाद मञ्च गठन गर्ने रहेका छन् ।

प्रशिक्षणमा स्थानीय आर्थिक विकासका आधारभूत अवधारणा, राष्ट्रिय नीति तथा कानुनी प्रावधान, स्थानीय तथा अन्तर्राष्ट्रिय अभ्यास, पहिचान भएका क्षेत्रहरूको योजना कार्यान्वयन, वित्तीय योजना तथा स्रोत व्यवस्थापन, जोखिम व्यवस्थापन, योजना अनुगमन तथा मूल्याङ्कन, स्थानीय आर्थिक विकास संवाद मञ्च गठन र कार्ययोजना कार्यान्वयन प्रतिबद्धता लगायतका विषय समेटिएका छन् । उद्घाटन कार्यक्रममा सोलुदुधकुण्ड नगरपालिकाकी उपमेयर गान्धिमाया तामाङले प्रशिक्षणबाट स्थानीय तहको आर्थिक विकाससम्बन्धी ज्ञान र क्षमता अभिवृद्धि हुने विश्वास व्यक्त गर्दै सहकार्यका लागि स्थानीय विकास प्रशिक्षण प्रतिष्ठानलाई धन्यवाद दिनुभयो ।

त्यसैगरी, स्थानीय विकास प्रशिक्षण प्रतिष्ठानका कार्यवाहक अध्यक्ष जयकृष्ण श्रेष्ठले यस्ता प्रशिक्षणले स्थानीय तहमा आर्थिक विकासका सम्भावनाहरू पहिचान गर्न र प्रभावकारी कार्ययोजना निर्माण गर्न महत्वपूर्ण योगदान पुग्ने बताउनुभयो । तालिममा नगरपालिकाका जनप्रतिनिधि, कर्मचारी तथा विकासप्रेमी सरोकारवालाहरूको सहभागिता रहेको छ । प्रशिक्षणबाट स्थानीय आर्थिक विकासलाई संस्थागत गर्दै दिगो आर्थिक समृद्धिका लागि आवश्यक योजना तथा कार्यक्रम कार्यान्वयनमा सहयोग जनाइएको छ ।