सेवा दिन सुङ्देल पुग्याे केपीलासगढी, एकीकृत घुम्ती सेवा शिविरबाट १७० जना लाभान्वित

जेठ २२, खोटाङ । खोटाङको कपिलासगढी गाउँपालिकाको वडा नम्बर ७ सुङदेलमा सञ्चालन गरिएको एकीकृत घुम्ती सेवा शिविरमार्फत विभिन्न सरकारी तथा परामर्श सेवासहित कुल ३८२ वटा सेवा प्रवाह गरिएको छ । गाउँपालिकाले नागरिकलाई घरदैलोमै सेवा उपलब्ध गराउने उद्देश्यले आयोजना गरेको शिविरबाट १७० जना सेवाग्राही प्रत्यक्ष लाभान्वित भएका छन् । केपिलासगढी गाउँपालिकाको आयोजना बालसेवा समाज नेर्पा खोटाङको सहआयोजना तथा जिफाउण्डेसनको प्राविधीक सहयोगमा सुङ्देलमा आयोजित सिविर मार्फत उक्त संख्याका सेवाग्राहीले सेवा लिएका हुन । शिविरमा सबैभन्दा बढी १०७ जनाले स्वास्थ्य सेवा लिएका छन् । स्वास्थ्य सेवा तर्फ स्वास्थ्य परीक्षण, प्रयोगशाला जाँच तथा स्वास्थ्य परामर्श प्रदान गरिएको थियो । त्यस्तै ६० जनाले ल्याब परीक्षण सेवा प्राप्त गरेका थिए।
शिक्षा क्षेत्रतर्फ ४४ जनाले शैक्षिक परामर्श सेवा लिएका छन् भने कृषि सेवाअन्तर्गत २२ जना कृषक लाभान्वित भएका छन्। पशु सेवा शिविरमा भने ७८ वटा पशुचौपायालाई औषधि वितरण तथा स्वास्थ्य परामर्श प्रदान गरिएको जनाइएको छ। महिला, बालबालिका तथा ज्येष्ठ नागरिक लक्षित सेवाबाट १० जना लाभान्वित भएका छन्। त्यस्तै सामाजिक सुरक्षा भत्ता तथा अन्य सेवासम्बन्धी २ जनाले परामर्श लिएका थिए।

राजस्व तथा मालपोत सेवाअन्तर्गत ३ वटा सेवा प्रदान गरिएको छ भने व्यवसाय दर्ता तथा नवीकरण सम्बन्धी ३ वटा सेवा सम्पन्न भएका छन्। योजना सम्बन्धी ४ वटा परामर्श, न्यायिक समितिमार्फत १ वटा विवाद निरुपण तथा ४४ जनालाई न्यायिक परामर्श सेवा प्रदान गरिएको शिविरको प्रतिवेदनमा उल्लेख छ। सामाजिक सुरक्षा तथा राष्ट्रिय परिचयपत्र सम्बन्धी सेवामा ३ जनाले सेवा लिएका छन् भने अपाङ्गता परिचयपत्रसम्बन्धी १ जनालाई परामर्श प्रदान गरिएको छ ।

शिविरमा विद्यार्थी लक्षित सेवाअन्तर्गत ४४ जना विद्यार्थी सहभागी भएका थिए, जसमा १२ जना छात्र र ३२ जना छात्रा रहेका थिए। त्यसैगरी विभिन्न सेवामा १०९ जना महिला र ६१ जना पुरुष सहभागी भएको तथ्यांकले देखाएको छ । गाउँपालिकाले दुर्गम बस्तीका नागरिकलाई सहज रूपमा सरकारी सेवा उपलब्ध गराउने लक्ष्यसहित सञ्चालन गरेको घुम्ती शिविर प्रभावकारी बनेको स्थानीयवासीले बताएका छन्।

सेवा लिन सदरमुकाम वा पालिकाको केन्द्रसम्म पुग्नुपर्ने बाध्यता कम भएको भन्दै सहभागीहरूले यस्ता कार्यक्रमलाई निरन्तरता दिन आग्रह गरेका छन् । गाउँपालिका मार्फत प्रदान गरिने सेवाहरुलाई गाउँ सम्म पु¥याएर सरकारी सेवामा नागरिक सहभागीतलाई जोड दिइएको गाउँपालिकाका प्रमुख प्रशासकीय अधिकृत सौधन राईले बताउनुभयो ।