रास्वपा सोलुखुम्बुको प्रथम जिल्ला अधिवेशन सम्पन्न, सभापतिमा कार्की पुनः चयन

सबिना राई, जेठ २४, सोलुखुम्बु । राष्ट्रिय स्वतन्त्र पार्टी (रास्वपा) सोलुखुम्बुको प्रथम जिल्ला अधिवेशनबाट पुन : नारायणकाजी कार्कीको नेतृत्वमा नेतृत्वमा १० सदस्यीय जिल्ला कार्यसमिति निर्विरोध चयन भएको छ । आईतबार सम्पन्न अधिवेशनले कार्कीलाई पुनः जिल्ला सभापतिको जिम्मेवारी सुम्पेको हो ।

नवनिर्वाचित कार्यसमितिको उपसभापतिमा पासाङ शेर्पा, सचिवमा रमेश कुमार बस्नेत, सहसचिवमा टेक बहादुर श्रेष्ठ निर्विरोध चयन हुनुभएको छ । अन्य सदस्यहरूमा धन बहादुर वि.क, जस बहादुर राई, लेमी लामा शेर्पा, जिकु शेर्पा, पुष्पलता बास्तोला र रेखा श्रेष्ठ सर्वसम्मत रूपमा चयन भएको रास्वपा सोलुखुम्बुले जनाएको छ ।

नवनिर्वाचित सभापति कार्कीले जिल्लाभर पार्टी सङ्गठनलाई थप सुदृढ, प्रभावकारी र जनमुखी बनाउँदै लैजाने प्रतिबद्धता व्यक्त गर्नुभयो । उहाँले सुशासन, पारदर्शिता र जवाफदेहितालाई केन्द्रमा राखी पार्टीका नीति तथा कार्यक्रमलाई स्थानीय तहसम्म प्रभावकारी रूपमा विस्तार गरिने बताउनुभयो । कार्यक्रममा पार्टीका नेता, कार्यकर्ता तथा शुभेच्छुकहरूको उल्लेखनीय उपस्थिती रहेको थियो ।