वडा अध्यक्ष सागर राईको पहलमा बन्यो जन्तेढुंगा–६ को वडा भवन

सबिना राई, जेठ २५ सोलुखुम्बु । खोटाङको जन्तेढुंगा गाउँपालिका वडा नं. ६ को नवनिर्मित प्रशासकीय भवन उद्घाटन गरिएको छ । लामो समयदेखि निर्माण हुन नसकेको वडा कार्यालय भवन वडा अध्यक्ष सागर राईको विशेष पहलमा निर्माण सम्पन्न भएपछि आईतबार कोशी प्रदेश सभा सदस्य तथा पूर्व भौतिक पूर्वाधार तथा स्वास्थ्य मन्त्री भुपेन्द्र राईको प्रमुख आतिथ्यतामा नवनिर्मित भवन उद्घाटन गरिएको हो ।

कार्यक्रम सभ्य र भव्य रूपमा सम्पन्न भएको जानकारी वडा अध्यक्ष सागर राईले दिनुभयो । नवनिर्मित भवनका लागि आवश्यक जग्गा स्थानीय समाजसेवी तिलकराम राई तथा उहाँकी श्रीमती राजकुमारी राईले उपलब्ध गराउनुभएको थियो । उद्घाटन कार्यक्रममा गाउँपालिकाका कर्मचारीहरूले स्वच्छ, निष्पक्ष, पारदर्शी, जनमुखी तथा भ्रष्टाचारमुक्त सार्वजनिक प्रशासन स्थापना गर्न सामूहिक प्रतिबद्धता व्यक्त गरेका थिए । अभाव, दबाब र प्रभावबाट मुक्त भई नागरिक हितलाई केन्द्रमा राखेर सेवा प्रवाह गर्ने तथा सार्वजनिक प्रशासनका मूलभूत सिद्धान्तलाई आत्मसात् गर्दै काम गर्ने प्रतिबद्धता कर्मचारीहरूले जनाएका छन् ।

वर्षौंदेखि आफ्नै सुविधासम्पन्न भवनको अभाव झेल्दै आएको वडा कार्यालयले अब नयाँ भवनबाट सेवा सञ्चालन गर्ने भएपछि स्थानीयवासी समेत उत्साहित बनेका छन् । भवन उद्घाटनमा गाउँपालिका अध्यक्ष अरुणादेवी राई, उपाध्यक्ष खेम बहादुर खड्का तथा जिल्ला समन्वय समिति खोटाङका सदस्य मेहन सुप्तिहाङको विशेष उपस्थिति रहेको थियो। उद्घाटन समारोहमा राजनीतिक दलका प्रतिनिधि, समाजसेवी, बुद्धिजीवी, शिक्षक तथा गाउँपालिकाका कर्मचारीहरूको समेत उल्लेख्य सहभागिता रहेको थियो ।