थुलुङ दुधकाेशी ८ रणेममा सार्वजनिक सुनुवाइ सम्पन्न

सोलुखुम्बु, असार ८ गते। थुलुङ्ग दुधकाेशी –८ रणेममा सार्वजनिक सुनुवाइ कार्यक्रम सम्पन्न भएको छ। वडा कार्यालयले चालु आर्थिक वर्षमा सञ्चालन गरेका योजना तथा कार्यक्रमको प्रगति समीक्षा र नागरिकका गुनासा तथा सुझाव संकलन गर्ने उद्देश्यले कार्यक्रम आयोजना गरिएको हो।

वडा अध्यक्ष राजेशबाबु किराँतीको अध्यक्षतामा सम्पन्न कार्यक्रममा स्थानीय समाजसेवी, बुद्धिजीवी, विभिन्न राजनीतिक दलका प्रतिनिधि, विद्यालयका प्रधानाध्यापक, विद्यालय व्यवस्थापन समिति अध्यक्ष, महिला प्रतिनिधिलगायतको सहभागिता रहेको थियो।

सुनुवाइका क्रममा सहभागीहरूले वडाको विकास निर्माण, सेवा प्रवाह तथा स्थानीय आवश्यकतासँग सम्बन्धित विभिन्न प्रश्न, जिज्ञासा र सुझाव राखेका थिए। उठाइएका विषयमा वडा कार्यालयले आवश्यक जानकारी तथा जवाफ दिएको जनाएको छ।

कार्यक्रमलाई सम्बोधन गर्दै वडा अध्यक्ष किराँतीले नागरिकबाट प्राप्त सुझाव र प्रतिक्रियालाई सकारात्मक रूपमा ग्रहण गरिएको बताउनुभयो। उहाँले जनताका अपेक्षा र आवश्यकतालाई केन्द्रमा राखेर आगामी योजना तथा कार्यक्रम सञ्चालन गरिने उल्लेख गर्नुभयो।

वडा कार्यालयका अनुसार चालु आर्थिक वर्षमा वडा नम्बर ८ मा विनियोजित ६५ लाख रुपियाँ बजेट विभिन्न विकास निर्माण तथा सेवा प्रवाहका कार्यक्रममार्फत कार्यान्वयन गरिएको छ।

स्थानीय तहमा सुशासन, पारदर्शिता र जवाफदेहिता अभिवृद्धि गर्ने माध्यमका रूपमा सार्वजनिक सुनुवाइ प्रभावकारी रहेको सहभागीहरूले बताएका छन्। कार्यक्रमले वडा कार्यालय र नागरिकबीचको सम्बन्धलाई थप सुदृढ बनाउनुका साथै सेवा प्रवाहप्रति नागरिकको विश्वास अभिवृद्धि गर्न सहयोग पुग्ने अपेक्षा गरिएको छ।