फाप्लुमा शैक्षिक गुणस्तर सुधारका लागि प्रधानाध्यापक र विद्यालय व्यवस्थापन समितिका पदाधिकारीलाई तालिम

सबिना राई, सोलुखुम्बु, जेठ २६ । हिमाली जिल्ला सोलुखुम्बुमा शैक्षिक गुणस्तर सुधार गर्ने उद्देश्यले प्रधानाध्यापक तथा विद्यालय व्यवस्थापन समितिका पदाधिकारीहरूलाई लक्षित गरी तालिम कार्यक्रम सुरु गरिएको छ । सहयोगी हातहरूको समूह (सहास) नेपालको आयोजनामा मंगलबारदेखि फाप्लुमा तालिम सञ्चालन गरिएको हो ।

सहास नेपाल परियोजनाका प्रमुख चुडामणी पहाडीको अध्यक्षता तथा सोलुदुधकुण्ड नगरपालिका शिक्षा शाखा प्रमुख रोजिना पौडेलको प्रमुख आतिथ्यतामा कार्यक्रमको उद्घाटन गरिएको आयोजकले जनाएको छ । तालिममा सोलुदुधकुण्ड नगरपालिका अन्तर्गतका १३ विद्यालयका २६ जना विद्यालय व्यवस्थापन समिति (विव्यस) अध्यक्ष तथा प्रधानाध्यापकहरूको सहभागिता रहेको छ । तालिमको सहजीकरण बृहत राष्ट्रिय शिक्षा अभियान नेपालका संयोजक अभिषेक घिमिरेले गरिरहनुभएको छ ।

उद्घाटन कार्यक्रममा बोल्दै सोलुदुधकुण्ड नगरपालिका–७ का वडा अध्यक्ष सोनाम ग्याल्जेन शेर्पाले शिक्षा क्षेत्रको सुधारका लागि सहास नेपालले दक्ष प्रशिक्षकमार्फत विद्यालयका जिम्मेवार व्यक्तिहरूलाई तालिम प्रदान गरेकोमा आभार व्यक्त गर्नुभयो । उहाँले नयाँ आर्थिक वर्षको बजेट निर्माणको तयारी भइरहेकाले विद्यालयका समस्या तथा आवश्यकताहरू जनप्रतिनिधिसमक्ष प्रस्तुत गर्न आग्रह गर्दै त्यसअनुसार बजेट व्यवस्थापन गर्न पहल गर्ने प्रतिबद्धता जनाउनुभयो ।

त्यसैगरी, शिक्षा शाखा प्रमुख रोजिना पौडेलले तालिमलाई अत्यन्त महत्वपूर्ण अवसरको रूपमा उल्लेख गर्दै विव्यस अध्यक्ष, शिक्षक अभिभावक संघका प्रतिनिधि तथा प्रधानाध्यापकहरूले तालिमबाट प्राप्त ज्ञान र सीप विद्यालयमा व्यवहारिक रूपमा लागू गर्नुपर्नेमा जोड दिनुभयो । कार्यक्रममा बोल्दै सहास नेपाल परियोजनाका प्रमुख चुडामणी पहाडीले तालिमले विद्यालय व्यवस्थापन तथा शैक्षिक नेतृत्वलाई थप प्रभावकारी बनाउन सहयोग पुग्ने विश्वास व्यक्त गर्नुभयो । उहाँले विद्यालयमा गुणस्तरीय शिक्षा प्रवद्र्धन गर्न विव्यस, शिक्षक र प्रधानाध्यापकहरूको भूमिका अझ सशक्त बन्ने अपेक्षा व्यक्त गर्नुभयो ।

तालिमको पहिलो दिन बृहत राष्ट्रिय शिक्षा अभियान नेपालका संयोजक अभिषेक घिमिरेले कृत्रिम बुद्धिमत्ता (एआई) प्रविधिको शैक्षिक क्षेत्रमा प्रयोग, नेपालका सामुदायिक तथा निजी विद्यालयबीचको अवस्था र भिन्नता, विद्यालयको भौतिक पूर्वाधार, सिकाइ वातावरण तथा विद्यार्थीहरूको मनोभावना बुझ्न शिक्षक, विव्यस अध्यक्ष र प्रधानाध्यापकको भूमिकाबारे उदाहरणसहित प्रशिक्षण दिनुभएको छ । आयोजकका अनुसार तालिमले विद्यालय व्यवस्थापनलाई थप प्रभावकारी बनाउँदै शैक्षिक गुणस्तर सुधारमा महत्वपूर्ण योगदान पुयाउने अपेक्षा गरिएको छ । तालिम बुधबार सम्म जारी रहने छ ।