जेठ २७, सोलुखुम्बु । सन् २०२६ को वसन्त ऋतुमा विश्वको सर्वोच्च शिखर सगरमाथा केन्द्रित पर्वतारोहण गतिविधि सफलतापूर्वक सम्पन्न भएको छ। यस वर्ष सगरमाथा आरोहणका लागि मात्रै ५६ देशका ४९५ विदेशी आरोहीले अनुमति लिएका थिए, जसमा ३९० पुरुष र १०५ महिला रहेका थिए। पर्यटन विभागका अनुसार अनुमति प्राप्त आरोहीसँगै उनीहरूका सहयोगी तथा गाइडहरू समेत गरी एक हजारभन्दा बढी व्यक्तिले यस वर्ष सगरमाथाको सफल आरोहण गरेका छन्। यस वर्ष सगरमाथामा सबैभन्दा धेरै १ सय ९ जना छिमेकी मुलुक चीनका आरोही पुगेका छन् ।
यसबाहेक अमेरिकाका ७७, भारतका ६१, बेलायतका ३२, रसियाका १८, अष्ट्रेलियाका १५, जापानका १४, क्यानडाका १२, नेपालका १२, आयरल्यान्डका ११ आरोही पुगेका छन् । यस वर्षको सगरमाथा आरोहण सिजनमा नेपाली आरोहीहरूले नयाँ कीर्तिमानसमेत कायम गरेका छन्। अनुभवी आरोही कामिरीता शेर्पा ले जेठ ३ गते सगरमाथाको चुचुरोमा ३२औँ पटक पुगेर आफ्नै विश्व कीर्तिमान तोडे। त्यस्तै, महिला आरोही लाक्पा शेर्पा ले ११ पटक सगरमाथा आरोहण गर्दै महिलातर्फको विश्व कीर्तिमानलाई थप उचाइमा पुर्याइन्।सगरमाथा आरोहणबाट सरकारले यस वर्ष एक अर्ब आठ करोड १० लाख ७२५ रुपैयाँ राजस्व सङ्कलन गरेको छ।
यो रकम नेपालले वसन्त ऋतुमा विभिन्न हिमाल आरोहण अनुमति दिएबापत सङ्कलन गरेको कुल एक अर्ब २६ करोड ४७ लाख ४१ हजार ३०६ रुपैयाँ राजस्वको ठूलो हिस्सा हो। पर्यटन विभागका अनुसार यस वर्ष ३१ वटा हिमाल आरोहणका लागि कुल एक हजार १९५ स्वदेशी तथा विदेशी आरोहीलाई अनुमति दिइएको थियो। तीमध्ये सबैभन्दा धेरै आकर्षण सगरमाथाप्रति देखिएको छ, जसले नेपाललाई विश्व पर्वतारोहणको प्रमुख गन्तव्यका रूपमा पुनः स्थापित गरेको छ।
Discussion about this post