सोताङमा नापी तथा भूमि प्रशासन कार्यालय स्थापना, अध्यक्ष बस्नेतद्वारा उद्घाटन

सबिना राई, जेठ २७, सोलुखुम्बु । सोलुखुम्बुको सोताङ गाउँपालिकामा भूमि सम्बन्धी सेवा स्थानीयस्तरमै उपलब्ध गराउने उद्देश्यसहित भूमि प्रशासन तथा नापी कार्यालय स्थापना गरिएको छ । बुधबार आयोजित एक कार्यक्रमबीच गाउँपालिकामा नवस्थापित भूमि प्रशासन तथा नापी कार्यालयको संयुक्त रूपमा उद्घाटन गरिएको हो । कार्यक्रम गाउँपालिकाका प्रमुख प्रशासकीय अधिकृत रमेश पौडेलको अध्यक्षतामा सम्पन्न भएको थियो भने गाउँपालिका अध्यक्ष खिलराज बस्नेत प्रमुख अतिथिका रूपमा सहभागी हुनुभएको थियो ।

कार्यक्रममा विभिन्न राजनीतिक दलका प्रतिनिधि, जनप्रतिनिधि, कर्मचारी तथा स्थानीयवासीहरूको उल्लेखनीय उपस्थिति रहेको थियो । उद्घाटन समारोहलाई सम्बोधन गर्दै अध्यक्ष बस्नेतले गाउँपालिकावासीलाई भूमि प्रशासन र नापीसम्बन्धी सेवा प्राप्त गर्न अब टाढासम्म धाउनुपर्ने बाध्यता अन्त्य हुने विश्वास व्यक्त गर्नुभयो । उहाँले कार्यालय स्थापनाका लागि गरिएको निरन्तर पहल र समन्वयको परिणामस्वरूप स्थानीय तहमा सेवा विस्तार सम्भव भएको बताउनुभयो ।

लामो समयदेखिको आवश्यकतालाई सम्बोधन गर्दै स्थापना गरिएको उक्त कार्यालयबाट जग्गा प्रशासन, नापजाँच तथा अन्य भूमि सम्बन्धी सेवाहरू स्थानीय नागरिकले सहज रूपमा प्राप्त गर्न सक्ने अपेक्षा गरिएको छ । गाउँपालिकाले यसलाई स्थानीय सेवा प्रवाहलाई थप प्रभावकारी, छिटोछरितो र नागरिकमैत्री बनाउने महत्वपूर्ण उपलब्धिका रूपमा लिएको जनाएको छ । नवस्थापित भूमि प्रशासन तथा नापी कार्यालय सञ्चालनमा आएसँगै सोताङ क्षेत्रका नागरिकहरूलाई समय, श्रम र आर्थिक खर्चको बचत हुनुका साथै सरकारी सेवा पहुँचमा समेत उल्लेखनीय सुधार हुने विश्वास गरिएको छ ।