सोताङमा बोलेरो दुर्घटना, चालकसहित तीन जना घाइते

जेठ २७, सोलुखुम्बु । सोलुखुम्बुको सोताङ गाउँपालिका–४ स्थित दाम्रोछो क्षेत्रमा बुधबार बोलेरो पिकअप दुर्घटना हुँदा चालकसहित तीन जना घाइते भएका छन्। जिल्ला प्रहरी कार्यालय सोलुखुम्बुका सूचना अधिकारी विकास राईका अनुसार बुङ–नाम्लुङ हुँदै गुदेलतर्फ जाँदै गरेको बा.प्र.०१–०३२ च २११९ नम्बरको डबलक्याप बोलेरो पिकअप बुधबार दिउँसो करिब १२ः४० बजे भित्री सडकखण्डमा अचानक अनियन्त्रित भई दुर्घटनामा परेको हो।

प्रहरीका अनुसार सवारी साधन सडकबाट बायाँतर्फ करिब १२५ मिटर तल खसेको थियो। दुर्घटनामा परेको बोलेरो पूर्ण रूपमा क्षतिग्रस्त भएको छ। घटनाबारे दिउँसो १ बजे जानकारी प्राप्त हुनासाथ प्रहरी चौकी बुङ र इलाका प्रहरी कार्यालय सोताङबाट प्रहरी टोली घटनास्थलमा खटिएको थियो। घाइतेहरूको तत्काल उद्धार गरी एम्बुलेन्समार्फत उपचारका लागि महाकुलुङ आधारभूत अस्पताल पठाइएको प्रहरीले जनाएको छ। दुर्घटनामा प्रेम कुलुङ घाइते भएका छन्।

महाकुलुङ गाउँपालिका–१ बुल्तोषम निवासी ३८ वर्षीय चालक कुलुङको चिउँडोमुनि दाहिनेतर्फ चोट लागेको छ भने उनको अवस्था सामान्य रहेको बताइएको छ। त्यसैगरी, उनकी श्रीमती रामठुली कुलुङ घाइते भएकी छन् । उनको टाउको तथा शरीरका विभिन्न भागमा चोट लागेको र अवस्था मध्यम रहेको जनाइएको छ। दुर्घटनामा लाक्पा सोनाम शेर्पा पनि घाइते भएका छन्। महाकुलुङ गाउँपालिका–५ निम्चोला निवासी २९ वर्षीय शेर्पाको दाहिने खुट्टा, कम्मर र बायाँ ढाडमा चोट लागेको छ। उनको अवस्था पनि मध्यम रहेको प्रहरीले जनाएको छ।