लिखु जलविद्युत आयोजनाबाट प्रभावित स्थानीयको आन्दोलन अस्थायी रूपमा स्थगित

सबिना राई, जेठ ३०, सोलुखुम्बु । एम्बी दुगर ग्रुपद्वारा रामेछापको उमाकुण्ड गाउँपालिका र सोलुखुम्बुको लिखुपिके गाउँपालिकाको सीमाबाट बग्ने लिखु नदीमा निर्माण गरिएका लिखु–१, लिखु–२ र लिखु–ए जलविद्युत आयोजनाबाट प्रभावित स्थानीय नागरिकहरूले आफ्ना विभिन्न माग राख्दै सञ्चालन गर्दै आएको आन्दोलन अस्थायी रूपमा स्थगित गरेका छन्।

संघर्ष समितिका सह–संयोजक विकास बस्नेतका अनुसार जेठ २५ गतेदेखि सात बुँदे मुख्य मागसहित आन्दोलन, संघर्ष तथा धर्ना कार्यक्रम सञ्चालन हुँदै आएको थियो। प्रभावित स्थानीयले आयोजनाबाट परेको असर तथा आफ्ना मागहरूको सम्बोधन हुनुपर्ने भन्दै निरन्तर दबाबमूलक कार्यक्रम गर्दै आएका थिए। जेठ २९ गते संघर्ष समिति र जलविद्युत आयोजनाका प्रतिनिधिबीच भएको प्रारम्भिक वार्तामा आगामी असार १ गते सोमबार बिहान १० बजे कम्पनीका आधिकारिक प्रतिनिधिहरूसँग औपचारिक वार्ता गर्ने सहमति भएको थियो।

सोही सहमतिअनुसार शुक्रबारदेखि आन्दोलनलाई शान्तिपूर्ण रूपमा स्थगित गरिएको सह संयोजक बस्नेतले जानकारी दिनुभयो। स्थानीयवासीले वार्ताबाट आफ्ना मागहरू सम्बोधन नभए थप सशक्त आन्दोलनका कार्यक्रम घोषणा गर्ने चेतावनी दिएका छन्। संघर्ष समितिले आवश्यक परे आयोजनाको किन्जास्थित कार्यालय तथा काठमाडौंस्थित केन्द्रीय कार्यालयमा समेत आन्दोलनका कार्यक्रम सञ्चालन गरिने जनाएको छ। प्रभावित नागरिकहरूले आफ्ना मागहरूको न्यायोचित सम्बोधन र आयोजनाबाट प्रभावित क्षेत्र तथा समुदायको हित सुनिश्चित गर्न सम्बन्धित पक्षसँग आग्रह गरेका छन्।