महुली लघुवित्तको १४औँ वार्षिकोत्सवमा वृक्षरोपण

जेठ ३०, सोलुखुम्बु । सोलुखुम्बुको नेलेस्थित महुली लघुवित्त वित्तिय संस्था लिमिटेड शाखा कार्यालयको १४औँ वार्षिक उत्सवको अवसरमा वृक्षरोपण कार्यक्रम सम्पन्न गरेको छ। शनिबार थुलुङदुधकोशी गाउँपालिका–१, नेलेस्थित भस्मे सामुदायिक वन क्षेत्रमा आयोजित कार्यक्रममा १७५ वटा सल्लाका बिरुवा रोपिएको शाखाले जनाएको छ।

वातावरण संरक्षण तथा हरियाली प्रवर्द्धन गर्ने उद्देश्यले कार्यक्रम आयोजना गरिएको हो। उक्त कार्यक्रममा सामुदायिक वनका अध्यक्ष रेवान्त बहादुर बस्नेत, वन सचिव चुल बहादुर भुजेल, प्रहरी चौकी नेलेका प्रमुख खम्ब बहादुर बिक, नेले सब–डिभिजन वन कार्यालयका प्रमुख शिव बहादुर अछामी लगायत विभिन्न स्थानीय केन्द्रका सदस्य, अभिभावक तथा शाखाका कर्मचारीहरूको सहभागिता रहेको थियो।

शाखा प्रमुख सान्तकला राईको नेतृत्वमा सम्पन्न कार्यक्रममा सहभागीहरूले वातावरण संरक्षणमा वृक्षरोपणको महत्वबारे जोड दिएका थिए। कार्यक्रम सफल बनाउन सहयोग गर्ने सबैप्रति शाखाले धन्यवाद व्यक्त गर्दै आगामी दिनमा पनि यस्तै सहकार्य र सहभागिता अपेक्षा गरेको जनाएको छ।