स्वास्थ्यकर्मी अनिशा धामीको मृत्युबारे संसदमा आवाज, एमाले सचेतक महरले मागे निष्पक्ष छानबिन

आसार १, सोलुखुम्बु । खोटाङको बराहपोखरी गाउँपालिका–१ स्थित स्वास्थ्य चौकीमा कार्यरत स्वास्थ्यकर्मी अनिशा कुमारी धामी मृत फेला परेको घटनाले संघीय संसदसम्म प्रवेश गरेको छ । प्रतिनिधिसभाको बैठकमा विशेष समय लिएर बोल्दै बझाङ निर्वाचन क्षेत्र नम्बर १ का सांसद तथा एमाले प्रमुख सचेतक ऐन महरले उक्त घटनाप्रति गहिरो दुःख व्यक्त गर्नुभएको छ । उहाँले घटना सामान्य आत्महत्याको विषय मात्र नभई हत्या हुनसक्ने आशंका व्यक्त गर्दै सत्यतथ्य पत्ता लगाउन सरकारको ध्यानाकर्षण गराउनुभएको छ ।

सांसद महरले स्वास्थ्य सेवा जस्तो संवेदनशील क्षेत्रमा कार्यरत एक युवतीको रहस्यमय मृत्युले परिवार, स्थानीय समुदाय तथा आम नागरिकमा गम्भीर प्रश्न उठाएको उल्लेख गर्दै घटनाको निष्पक्ष, स्वतन्त्र र गहिरो अनुसन्धान गर्न माग गर्नुभयो । उहाँले दोषी जोसुकै भए पनि कानुनी दायरामा ल्याउनुपर्ने र पीडित परिवारले न्याय पाउनुपर्ने धारणा राख्दै घटनालाई सामान्य रूपमा नलिन सरकारलाई आग्रह गर्नुभयो ।

गत असार ३१ गते खोटाङको बराहपोखरी गाउँपालिका–१ स्थित डेरामा बस्दै आएकी बझाङ केदारस्युँ गाउँपालिका–७ की २३ वर्षीया स्वास्थ्यकर्मी अनिशा कुमारी धामी सलको पासो लगाई झुन्डिएको अवस्थामा मृत फेला परेकी थिइन्। घटनाबारे प्रहरीले थप अनुसन्धान गरिरहेको जनाएको छ । यस घटनाले सामाजिक सञ्जालदेखि संसदसम्म चासो र बहस उत्पन्न गरेको छ ।